កាលពីលេខមុន សុភាពនារីបានជ្រាបរួចមកហើយអំពីការរចនាម៉ូតក្រចកចំនួន៦យ៉ាង។ នៅលេខនេះ សូមបន្ដជ្រាប បន្ថែមទៀតពីការរចនាម៉ូតក្រចកដ៏គួរឱ្យទាក់ទាញ៤យ៉ាងទៀត។ ការរចនាម៉ូតក្រចកគឺជាបញ្ហាមួយសំខាន់ក្នុងការជួយបន្ថែមនូវ សោភ័ណភាពនៃសម្រស់ម្រាមដៃ និងអាចបន្ថែមនូវការទាក់ទាញផងដែរ។
ទស្សនាវដ្ដី សុខភាពយើង បានជួបជាមួយអ្នកនាង បូភ័ណ ម្ចាស់ហាងបូភ័ណកែសម្ផស្សនឹងធ្វើការពន្យល់អំពីការរចនាម៉ូតក្រចក ដើម្បីឱ្យស្ដ្រីគ្រប់រូបបានយល់ និងជ្រាបឱ្យកាន់តែច្បាស់បន្ថែមទៀតអំពីម៉ូតក្រចក។ ម៉ូតក្រចកសម្រាប់រចនាមានច្រើន ម៉ូតណាស់ទៅតាមការច្នៃប្រឌិត។ នៅពេលនេះ ទស្សនាវដ្ដី សុខភាពយើង សូមលើកយកមកបង្ហាញនូវម៉ូតក្រចក៦យ៉ាងបន្ថែមទៀត ដើម្បីឱ្យមិត្ដនារីបានផ្លាស់ប្ដូរនូវការរចនាម៉ូតក្រចកបានកាន់តែច្រើនទៀត។
7 . ម៉ូតក្រចកដាំត្បូង ៖ ជាដំបូងសុភាពនារីគួរតែសម្អាត និងកាត់សាច់ក្រចកឱ្យបានស្អាតជាមុនសិន ដើម្បីការពារ កុំឱ្យឆ្លងមេរោគ ជាពិសេសអាចធ្វើឱ្យក្រចកស្រស់ស្អាតនៅពេលដែលរចនាម៉ូត។ ការរចនាម៉ូតក្រចកដាំត្បូងនេះ ជាដំបូងត្រូវលាប ពណ៌ដែលចូលចិត្ដ តែបើសម្រាប់កូនក្រមុំត្រូវប្រើពណ៌ក្រហមទុកឱ្យស្ងួត ហើយត្រូវលាបថ្នាំទឹករលោងពីលើក្រចកពណ៌។ បន្ទាប់មកត្រូវប្រើកាវសម្រាប់បិតត្បូង ដោយយកកាវទៅបន្ដក់នៅលើត្បូងហើយនិងនៅលើក្រចក ជាម៉ូតទៅតាមការចូលចិត្ដជាការស្រេច។ ចំពោះម៉ូតក្រចកប្រភេទនេះ អាចចូលរួមបានគ្រប់កម្មវិធីសម្រាប់យុវវ័យ ជាពិសេសកូនក្រមុំ។
8 . ម៉ូតក្រចកវាំងនន ៖ ចំពោះម៉ូតក្រចកវាំងនននេះទាមទារការយកចិត្ដទុកដាក់បន្ដិចសម្រាប់អ្នករចនាម៉ូត ជាដំបូង សុភាពនារីត្រូវសម្អាតក្រចក បន្ទាប់មកត្រូវលាបពណ៌ក្រចកទៅតាមចំណង់ចំណូលចិត្ដទុកឱ្យស្ងួត។ បន្ទាប់មកទៀតត្រូវប្រើថ្នាំគូសក្រចកពណ៌ខ្មៅឬក៏ពណ៌អ្វីក៏បានឱ្យស៊ីជាមួយនឹងពណ៌ដែលលាបនៅលើក្រចក ដោយគូសជាសំណាញ់បញ្ឆិត។ បន្ទាប់មកទៀតត្រូវ គូសខ្សែវាំងននហើយបន្ដក់នៅចុងវាំងននឱ្យដូចជាខ្សែវាំងននរួចទុកឱ្យស្ងួត និងលាបទឹករលោងជាការស្រេច។ ចំពោះម៉ូតក្រចក ប្រភេទនេះប្រើសម្រាប់យុវវ័យ និងអាចចូលរួមបានគ្រប់ពិធី ជាពិសេសក្នុងពិធីរាត្រីស្រមោលស។
9 . ម៉ូតក្រចកខ្វែងបញ្ឆិត ៖ ម៉ូតក្រចកខ្វែងបញ្ឆិតនេះជាដំបូងសុភាពនារីត្រូវសម្អាតក្រចក បន្ទាប់ត្រូវលាបពណ៌ក្រចកទៅតាមចំណង់ចំណូលចិត្ដទុកឱ្យស្ងួត។ បន្ទាប់មកទៀតត្រូវប្រើថ្នាំគូសក្រចកពណ៌ខ្មៅគូសខ្វែងហើយបន្ដក់ពណ៌សឬក៏ជា ពណ៌អ្វីក៏បានទៅតាមចំណង់ចំណូលចិត្ដ រួចទុកឱ្យស្ងួតលាបទឹករលោងជាការស្រេច។ ម៉ូតក្រចកប្រភេទនេះសក្ដិសមសម្រាប់យុវវ័យ និងស្ដ្រីវ័យកណ្ដាល អាចចូលរួមបានគ្រប់ពិធី។
10 . ម៉ូតក្រចកពងជីងចក់ ៖ សម្រាប់ម៉ូតក្រចកពងជីងចក់នេះ ជាដំបូងសុភាពនារីត្រូវធ្វើការសម្អាតក្រចកឱ្យបានស្អាតល្អ រួមទាំងកាត់សាច់ក្រចកផងដែរ។ បន្ទាប់មកត្រូវលាបពណ៌ចំណង់ចំណូលចិត្ដទុកឱ្យស្ងួត។ នៅចុងក្រចកត្រូវហាយឡាយដាក់ជាទឹករលក ហើយដាក់ពណ៌ឱ្យស៊ីជាមួយនឹងពណ៌ក្រចកទុកឱ្យស្ងួត បន្ទាប់មកទៀតត្រូវប្រើថ្នាំគូសក្រចកពណ៌ខ្មៅ ឬក៏ជាពណ៌អ្វីក៏បានទៅតាមចំណង់ចំណូលចិត្ដយកមកបន្ដក់ឱ្យចេញជារូបរាងស្អាតដោយមិនត្រូវបន្ដក់ញឹកពេកនោះទេ រួចទុកឱ្យស្ងួតហើយលាបទឹករលោង ជាការស្រេច។ ចំពោះម៉ូតក្រចកប្រភេទនេះប្រើសម្រាប់យុវវ័យ និងស្ដ្រីវ័យកណ្ដាល អាចចូលរួមបានគ្រប់ពិធី។
ប្រភព ៖ ទស្សនាវដ្តី សុខភាពយើង លេខ៥១ ខែមេសា ឆ្នាំ២០១០
Leave a Reply