មិនថាបុរសឬក៏ស្ដ្រីទេ តែងតែយកចិត្ដទុកដាក់បំផុតទៅលើសម្រស់ ភាពស្រស់ស្អាត និងការរៀបចំខ្លួនប្រចាំថ្ងៃ។ មានបុរសមួយចំនួនចាប់អារម្មណ៍ខ្លាំងបំផុតទៅលើការស្លៀកពាក់។ គ្រប់ពេលវេលាគ្រប់ទីកន្លែងសុទ្ធតែទាមទារឱ្យមានការស្លៀកពាក់ឱ្យ បានសមស្រប និងសមរម្យ។ ចំពោះការស្លៀកពាក់ តើបុរសគ្រប់រូបគួររៀបចំ និងជ្រើសរើសយ៉ាងណាដើម្បីឱ្យបានល្អប្រសើរ និង មានរបៀបរៀបរយល្អ? កាលពីលេខមុនលោកអ្នកបានជ្រាបរួចមកហើយ អំពីរបៀបស្លៀកពាក់ប្រចាំថ្ងៃរបស់ស្ដ្រី។
លោកស្រី សុខ ស្រីណា ម្ចាស់ហាងលក់សម្លៀកបំពាក់ឡាន់ណា នឹងបង្ហាញជូនមិត្ដអ្នកអានអំពីរបៀបស្លៀកពាក់ប្រចាំថ្ងៃ របស់បុរស តាមរយៈទស្សនាវដ្ដី សុខភាពយើង។ បុរសតែងយកចិត្ដទុកដាក់ណាស់ក្នុងការស្លៀកពាក់ប្រចាំថ្ងៃ មិនថាក្នុងកាលៈទេសៈ ណាមួយឡើយ។ ការរៀបចំខ្លួនឱ្យបានសមរម្យ មានរបៀបរៀបរយល្អដើម្បីសោភ័ណភាពត្រូវបែងចែកទៅតាមពេលវេលា និងទីកន្លែង។
សម្លៀកបំពាក់សម្រាប់នៅផ្ទះ
ពេលនៅផ្ទះបុរសពុំធ្លាប់យកចិត្ដទុកដាក់ក្នុងការជ្រើសរើសសម្លៀកបំពាក់ដើម្បីស្លៀកពាក់ប៉ុន្មានឡើយ។ ប៉ុន្ដែក៏មានបុរស មួយចំនួនរៀបចំយ៉ាងហ្មត់ចត់ចំពោះការស្លៀកពាក់ពេលនៅផ្ទះ។ ជាធម្មតាបុរសនិយមស្លៀកខោជើងខ្លីជាមួយអាវយឺត ឬអាវវាល ក្លៀក(អាវកាក់)ហើយក៏មានមួយចំនួនស្លៀកខោជើងវែង។ រីឯបុរសវ័យចំណាស់បែរជានិយមស្លៀកសារ៉ុងសូត្រជាមួយអាវកវាល។ បុរសនៅជនបទចូលចិត្ដស្លៀកក្រមា។
សម្លៀកបំពាក់សម្រាប់ធ្វើការ
សម្លៀកបំពាក់ធ្វើការ ពេលខ្លះជាឯកសណ្ឋានដែលរៀបចំដោយស្ថាប័ន ឬអង្គការកំណត់ឱ្យស្លៀកពាក់ ជាទូទៅជាសម្លៀក បំពាក់ឈុត ខោជើងវែង អាវក្រណាត់មានក ដៃវែង និងពេលខ្លះមានអាវធំខាងក្រៅផងដែរ។ ដោយអាកាសធាតុប្រទេសយើងក្ដៅ បុគ្គលិកទាំងអស់មិនសូវប្រើក្រវាត់កទេ មានតែមួយចំនួនតូច និងចំពោះក្រុមហ៊ុនឯកជនខ្លះតែប៉ុណ្ណោះ។ លោកអ្នកដែលជាបុគ្គលិក ឬ មន្ដ្រីរាជការស៊ីវិលច្រើនស្លៀកខោសាច់ក្រណាត់ពណ៌ខៀវ ខ្មៅ កាកអំពៅជាដើម ជាមួយអាវដៃវែងឬដៃខ្លីមានក ពណ៌ស ឬពណ៌ផ្ទៃ មេឃ។
សម្លៀកបំពាក់សម្រាប់ពិធីជប់លៀង
ចំពោះការចូលរួមក្នុងពិធីជប់លៀងជារឿងសំខាន់ណាស់ដែលត្រូវរៀបចំខ្លួនឱ្យមានរបៀបរៀបរយទាំងការតុបតែងខ្លួនក៏ ដូចជាការស្លៀកពាក់។ ប៉ុន្ដែបុរសពុំសូវជាមានលក្ខខណ្ឌច្រើន និងស្មុគស្មាញដូចស្ដ្រីនោះឡើយ។ បុរសចូលចិត្ដស្លៀកខោក្រណាត់ ជើងវែងជាមួយអាវក្រណាត់ ឬហូលផាមួងដៃវែង ឬដៃខ្លី។ យុវវ័យអាចជ្រើសរើសសម្លៀកបំពាក់បែបសម័យថ្មីពេញនិយមសម្រាប់ ការចូលរួម។ ដោយឡែកពិធីមួយចំនួនតម្រូវឱ្យបុរសពាក់អាវធំ(អាវគ្រ័រហ្ស៊េ)ខាងក្រៅថែមមួយជាន់ទៀត។
សម្លៀកបំពាក់សម្រាប់ដំណើរកម្សាន្ដ
កម្ពុជាជាប្រទេសដែលសម្បូរទៅដោយតំបន់ទេសចរណ៍និងរមណីយដ្ឋាន ដំណើរកម្សាន្ដតាមតំបន់ទេសចរណ៍មានច្រើនប្រ ភេទ ដូចជាតំបន់ភ្នំ សមុទ្រជាដើម នាំឱ្យការរៀបចំខ្លួនរបស់អ្នកទេសចរក៏ត្រូវបែងចែកទៅតាមនោះដែរ។
- ដំណើរកម្សាន្ដតាមតំបន់ភ្នំ ៖ ក្នុងការដើរកម្សាន្ដ បុរសក៏មិនខុសពីស្ដ្រីប៉ុន្មានដែរ តែងតែយកចិត្ដទុកដាក់ក្នុងការតុបតែង លម្អខ្លួនប្រាណឱ្យបានសមរម្យ បុរសគួរជ្រើសរើសការស្លៀកជាខោសាច់ក្រណាត់ក្រាស់ៗ ខោគគីរជើងខ្លីជាមួយអាវយឺតដៃខ្លី ឬវែង ។ យុវវ័យអាចស្លៀកខោខូវប៊យ ពាក់អាវយឺតហើយមានអាវធំដៃវែងពីខាងក្រៅ។
- ដំណើរកម្សាន្ដតាមតំបន់សមុទ្រ ៖ ជារឿងដែលងាយស្រួលបំផុតសម្រាប់បុរសដែលធ្វើដំណើរកម្សាន្ដតាមតំបន់សមុទ្រ ឬលេងទឹកសមុទ្រនោះ។ ពួកគេគ្រាន់តែស្លៀកពាក់ជាធម្មតាតាមការនិយមចូលចិត្ដ។ អ្នកខ្លះស្លៀកខោខូវប៊យ អាវយឺត និងអាវធំដៃ វែងពីខាងក្រៅ។ អ្នកខ្លះទៀតចូលចិត្ដធ្វើដំណើរដោយស្លៀកខោជើងខ្លីជាមួយអាវយឺត ឬអាវវាលក្លៀកជារបៀបអាវកីឡា។ ចំពោះ ការលេងទឹក ឬលេងតាមឆ្នេរសមុទ្រ បុរសនិយមស្លៀកខោជើងខ្លី និងខោប៊ីគីនីរឹបត្រឹមភ្លៅជាមួយអាវវាលក្លៀក ជួនពេលខ្លះគ្មានអាវ ផងក៏មានដែរ។
រូបភាពទស្សនាវដ្តីសុខភាពយើង
សម្លៀកបំពាក់សម្រាប់ហាត់កីឡា
វិស័យកីឡាកំពុងតែរីកដុះដាលនៅទូទាំងពិភពលោក រួមទាំងនៅកម្ពុជាផងដែរ។ ការហាត់កីឡាដើម្បីសុខភាពជាកត្ដា ចាំបាច់ណាស់សម្រាប់មនុស្សគ្រប់វ័យគ្រប់ស្រទាប់វណ្ណៈ។ ដើម្បីធ្វើឱ្យការហាត់ប្រកបទៅបានល្អ និងមានភាពងាយស្រួល ក៏អាស្រ័យ ទៅលើការស្លៀកពាក់ផងដែរ។ កីឡាមានច្រើនប្រភេទ និងរបៀបហាត់ខុសៗគ្នា ដូចនេះការជ្រើសរើសសម្លៀកបំពាក់ក៏មានច្រើន យ៉ាងទៅតាមប្រភេទកីឡានីមួយៗ។
- សម្លៀកបំពាក់សម្រាប់កីឡាហែលទឹក ៖ ការហែលទឹកតម្រូវឱ្យមានការជ្រើសរើសសម្លៀកបំពាក់ដើម្បីឱ្យការធ្វើចលនា ដៃជើងមានភាពងាយស្រួលក្នុងការហែលទឹក។ បុរសមិនចោទជាបញ្ហាខ្មាសអៀនឡើយ ពេលហែលទឹកបុរសនិយមស្លៀកខោខ្លី អាច ជាខោទ្រនាប់រឹប ឬខោប៊ីគីនី ប៉ុន្ដែបុរសមិននិយមពាក់អាវនោះទេ។ នៅមានបុរសមួយចំនួនមានភាពអៀនខ្មាស ហើយពួកគេជ្រើស រើសការស្លៀកខោជើងខ្លី និងពាក់អាវយឺតដៃខ្លី ឬវាលក្លៀក។
- សម្លៀកបំពាក់សម្រាប់កីឡាវាយសី ៖ ការលេងកីឡាវាយសី បុរសនិយមស្លៀកខោកីឡាខ្លី ឬវែងមានហោប៉ៅសង្ខាង។ ចំណែកអាវវិញជាប្រភេទអាវយឺតដៃខ្លី។ គេច្រើនស្លៀកខោជើងខ្លីត្រឹមជង្គង់ ឬជើងវែងជាលក្ខណៈខោកីឡា ភាគច្រើនពណ៌ស។
- សម្លៀកបំពាក់សម្រាប់កីឡាផ្សេងៗ ៖ កីឡាក្នុងក្លឹបដូចជារត់លើម៉ាស៊ីន រត់លេងយឺតៗ ដើរជាដើម បុរសច្រើនពាក់អាវ យឺតដៃខ្លី ជាមួយខោកីឡាជើងវែង ឬជើងខ្លី។ ប៉ុន្ដែសម្រាប់អ្នកកីឡាអាជីព គួរស្លៀកខោជើងខ្លីត្រឹមភ្លៅ និងអាវយឺតដៃខ្លី។
សម្លៀកបំពាក់សម្រាប់ពេលទទួលទានដំណេក
រាត្រីជាវេលាដ៏សំខាន់ដែលលោកអ្នកត្រូវការសម្រាក។ បុរសក៏ដូចជាស្ដ្រីដែរ គួរជ្រើសរើសជាសម្លៀកបំពាក់ឈុត ឬអាវ យឺតដៃខ្លីជាមួយខោជើងវែង ឬខោជើងខ្លី។ បុរសមួយចំនួនមិននិយមស្លៀកពាក់ជិតខ្លួននៅពេលយប់នោះទេ ដោយគ្រាន់តែស្លៀក ខោខ្លី ក្រមា ឬកន្សែងពោះគោតែប៉ុណ្ណោះ។ ចំណែកសម្លៀកបំពាក់ឈុតដែលនិយមប្រើនោះ គួរជ្រើសយកប្រភេទសាច់ទន់រលោង និងស្ដើងបន្ដិច។
បណ្ដាំផ្ញើអ្នកប្រឹក្សា
មិនថាតែស្ដ្រីនោះទេ បុរសក៏ដូចគ្នាដែរ ត្រូវរៀបចំខ្លួនឱ្យមានរបៀបរៀបរយ និងមានសណ្ដាប់ធ្នាប់សមរម្យ។ ការស្លៀក ពាក់ក៏ជារឿងសំខាន់មួយដែរ ដែលលោកអ្នកគួរមានការចាប់អារម្មណ៍។ ការស្លៀកពាក់មានរបៀបរៀបរយទៅតាមកាលៈទេសៈ ជា ទម្លាប់ដ៏ល្អមួយសម្រាប់បុរសគ្រប់រូប ព្រោះថាការស្លៀកពាក់ជាសុជីវធម៌មួយដែលអាចធ្វើឱ្យលោកអ្នកមានកិត្ដិយស និងការគោរព ស្រឡាញ់អំពីអ្នកផងទាំងពួង។
ប្រភព ៖ ទស្សនាវដ្តី សុខភាពយើង លេខ០១៣ ខែកុម្ភៈ ឆ្នាំ២០០៧
