អ្នកនាងម៉េង កែវពេជ្ជតា ជាតារាចម្រៀងមួយរូបដែលមានឈ្មោះបោះសម្លេងល្បីរន្ទឺក្នុងព្រះរាជាណាចក្រកម្ពុជា។ អ្នកណាក៏ស្គាល់អ្នកនាង និងតែងតែនិយាយកោតសរសើរថា ពេជ្ជតាមានសម្លេងពីរោះ និងរូបសម្រស់ស្រស់ស្អាតមើលទៅមិន សមថាមានបុត្រមួយនោះទេ ទាំងសាច់សខ្ចី និងផ្ទៃមុខស្រស់ផូរផង់។ តើប្រិយមិត្ដអ្នកអានចង់ដឹងទេថាអ្នកនាងមានអាថ៌កំបាំង យ៉ាងណាក្នុងការថែរក្សាសម្រស់ឱ្យបានល្អនោះ។
ទស្សនាវដ្ដី សុខភាពយើង បានធ្វើការសម្ភាសន៍ជាមួយអ្នកនាងម៉េង កែវពេជ្ជតា ផ្ទាល់ ប្រយោជន៍ចង់ដឹងថាអ្នកនាង មានអ្វីដែលអាចធ្វើឱ្យរូបសម្រស់ស្រស់ស្អាតដូចនេះ។
ប្រវត្ដិមុនពេលចូលក្នុងវិស័យសិល្បៈ
កាលពីនៅជាកុមារភាពអ្នកនាងម៉េង កែវពេជ្ជតា បានរៀនសូត្រនៅសាលាសុធារស ក្នុងកំឡុងឆ្នាំ១៩៨២។ បន្ទាប់មកអ្នក នាងបានរៀននៅវិទ្យាល័យបឹងត្របែករហូតដល់បញ្ចប់ការសិក្សា។ ឪពុករបស់អ្នកនាងជាគ្រូបង្ហាត់សិល្បៈមួយរូបកាលសម័យនោះ គឺ លោក ម៉េង ហ៊ុន ដែលលោកបានបង្ហាត់បង្រៀននៅសកលវិទ្យាល័យវិចិត្រសិល្បៈ។ ចំណែកឯម្ដាយ លោកស្រី កែវ សង្វាពេជ្ជ ដែលជាអ្នកច្រៀងអាយ៉ៃដ៏ល្បីឈ្មោះម្នាក់ដែរនៅសម័យនោះ។ ឪពុករបស់អ្នកនាងពេជ្ជតា បានបង្ហាត់បង្រៀនអ្នកនាងឱ្យក្លាយជាអ្នក សិល្បៈតាំងតែអាយុ៨ឆ្នាំមកម្ល៉េះ។ រហូតមកដល់ពេលនេះអ្នកនាងបានថតឱ្យផលិតកម្មជាច្រើន ទាំងនៅក្នុងស្រុក និងនៅក្រៅស្រុកប៉ុន្ដែអ្នកនាងមិនដែលមានកុងត្រានឹងផលិតកម្មណាមួយឡើយ។ នៅឆ្នាំ២០០៥ អ្នកនាងបានរៀបអាពាហ៍ពិពាហ៍ជាមួយលោក មួង ឃីម ជាមន្ដ្រីនៅក្នុងរដ្ឋាភិបាលមួយរូប។ ហើយឥឡូវនេះអ្នកនាងទទួលបានបុត្រាមួយហើយ។
វិធីថែរក្សាសម្រស់
អ្នកនាងពេជ្ជតា មានវិធីសាស្ដ្រក្នុងការថែរក្សាសម្រស់ខ្លះៗដែលធ្វើឱ្យសម្ផស្សរបស់អ្នកនាងស្រស់ស្អាតដូចជាតារាវ័យ ក្មេងមួយចំនួន។ ទោះបីជាអ្នកនាងមានអាយុច្រើនគួរសមហើយក៏ដោយក៏សម្ផស្សស្បែករបស់អ្នកនាងនៅតែស្រស់ស្អាតដូចជាស្ថិត នៅវ័យ១៨ឆ្នាំអញ្ចឹង។
- ការថែរក្សាសក់ ៖ អ្នកនាងពេជ្ជតាបានជ្រើសរើសសាប៊ូកក់សក់ដែលតម្រូវទៅតាមសរសៃសក់។ ដោយសារសក់របស់ អ្នកនាងលាបពណ៌ ដូចនេះតម្រូវមានការយកចិត្ដទុកដាក់ថែរក្សាបន្ដិច។ ការកក់សក់របស់អ្នកនាងធ្វើឡើងជារៀងរាល់ពីរថ្ងៃម្ដង ឬអាចពេលខ្លះកក់សឹងតែរាល់ថ្ងៃ ដោយសារតែត្រូវធ្វើសក់ដើម្បីឡើងកម្មវិធី ឬចេញថតផ្សេងៗ។
- ការថែរក្សាភ្នែក ៖ ចំពោះកែវភ្នែកវិញនោះអ្នកនាងពេជ្ជតាមិនមានអ្វីដែលធ្វើឱ្យប៉ះពាល់ខ្លាំងទៅលើកញ្ចក់ភ្នែកនោះ ទេ ដោយសារតែអ្នកនាងមិនសូវថតផ្ទាល់ត្រូវនឹងពន្លឺព្រះអាទិត្យទេ។ ជាទូទៅអ្នកនាងតែងតែថតនៅក្នុងទីកន្លែងដែលត្រជាក់ និង ប្រើប្រាស់ពន្លឺភ្លើងអគ្គិសនីច្រើនជាងការថតនៅហាលវាលហាលថ្ងៃ។ ដូច្នេះទើបធ្វើឱ្យភ្នែកអ្នកនាងល្អមិនសូវមានបញ្ហា។
ការថែរក្សារោមភ្នែក ចិញ្ចើម និងបបូរមាត់ ៖ ចំពោះបបូរមាត់វិញអ្នកនាងប្រើប្រាស់ផលិតផលដែលមានគុណភាពល្អ ជាពិសេសផលិតផលក្រៅស្រុកដោយសារតែវាមានគុណភាពខ្ពស់ក្នុងការធ្វើឱ្យបបូរមាត់មើលទៅស្រស់ស្អាតមិនស្ងួត។ ទោះបីជា ពេលដែលជូតវាចេញក៏ដោយ ក៏មើលទៅឃើញមាត់យើងមានភាពស្រទន់ និងក្រហមព្រឿងៗជានិច្ច។ ចំណែកឯរោមភ្នែកវិញ អ្នកនាងតែងប្រើជារោមភ្នែកពាក់ ដើម្បីកុំឱ្យរោមភ្នែកដែលមានពីធម្មជាតិនោះដាច់ ឬជ្រុះជាដើម។ ចិញ្ចើមវិញគឺអ្នកនាងតែងគូស បន្ដិចៗពេលដែលចេញទៅខាងក្រៅ ប៉ុន្ដែបើពេលចេញទៅកម្មវិធីអ្វីមួយ ឬឡើងថតនោះគឺអ្នកនាងគូសទៅតាមទម្រង់មុខដើម្បីឱ្យ សក្ដិសម។
- ការថែរក្សាធ្មេញ ៖ ជាធម្មតាធ្មេញអ្នកនាងស្រស់ស្អាតដូចធម្មជាតិទោះបីមិនសូវមានពេលទៅជួបទន្ដពេទ្យជាញឹកញាប់ ក៏ដោយ ដោយសារតែអ្នកនាងមានការរវល់នឹងការងារច្រើន។ អ្នកនាងបានជ្រើសរើសថ្នាំដុសធ្មេញដែលត្រូវនឹងអញ្ចាញធ្មេញ ទៅ តាមវេជ្ជបញ្ជារបស់ទន្ដពេទ្យបានណែនាំឱ្យប្រើ។
-
រូបភាពទស្សនាវដ្ដីសុខភាពយើង ការថែរក្សាស្បែកមុខ ៖ អ្នកនាងចូលចិត្ដការផាត់មុខបែបធម្មជាតិស្ដើងៗ និងចូលចិត្ដផាត់ភ្នែកបែបសាមញ្ញជាពណ៌ ដែលមិនរើសសម្លៀកបំពាក់។ អ្នកខ្លះទៀតចូលចិត្ដលាបពណ៌ភ្នែកឱ្យដូចនឹងពណ៌សម្លៀកបំពាក់តែចំពោះអ្នកនាងវិញនោះមិនសូវជា ចូលចិត្ដធ្វើអញ្ចឹងទេ។ ពេលដែលអ្នកនាងឡើងថតតែងតែត្រូវការប្រើប្រាស់សម្លៀកបំពាក់ច្រើនម៉ូតក្នុងការថត។ បើផាត់មុខបែប ធម្មតាៗនោះ វាមិនមានអ្វីប៉ះពាល់ដល់សម្លៀកបំពាក់ទេ។ នៅមុនពេលដែលផាត់មុខអ្នកនាងតែងតែលាបផលិតផលការពារស្បែក មុខ ទុកឱ្យស្ងួតរួចមកផាត់ម្សៅទ្រនាប់ ហើយផាត់ម្សៅហុយពីលើ។ ចំណែកឯភ្នែកវិញនោះ គឺផាត់ពណ៌ទៅតាមការពេញចិត្ដរបស់ អ្នកនាង។
- ការថែរក្សាស្បែកខ្លួន ៖ ជាទូទៅអ្នកនាងតែងតែប្រើសាប៊ូដែលត្រូវនឹងស្បែកខ្លួន នៅពេលងូតទឹកម្ដងៗ។ ពេលដែលងូត ទឹករួចហើយភាគច្រើនអ្នកនាងប្រើប្រាស់ជាផលិតផលការពារស្បែកលាបខ្លួនទៅតាមការពេញចិត្ដនិងក្លិនរបស់ផលិតផលនីមួយៗ។
- ការថែរក្សាក្រចក ៖ ជានិច្ចកាល អ្នកនាងច្រើនតែប្រើជាក្រចកសិប្បនិម្មិត ព្រោះខ្លាចក្រចកងាយខូចដោយសារតែការ លាបពណ៌ច្រើន។ ពេលឡើងឆាក ឬពេលដែលឡើងថត អ្នកនាងតែងតែបិទក្រចកពេលចប់កម្មវិធីអ្នកនាងក៏ដោះវាចេញវិញ។ ពេជ្ជតាតែងប្រើជាថ្នាំលាបការពារក្រចកដើម្បីកុំឱ្យក្រចកមើលទៅខ្មៅ ឬលឿង។
ការថែទាំសុខភាពផ្លូវកាយ
អ្នកនាង ម៉េង កែវពេជ្ជតា មានការមមាញឹកច្រើន ពេលខ្លះជាកិច្ចការគ្រួសារ ដែលត្រូវតែធ្វើជាបន្ទាន់។ ដូច្នេះអ្នកនាងមិនសូវជាមានពេលវេលាក្នុងការថែរក្សារាងកាយប៉ុន្មានទេ។ តែទោះជាយ៉ាងណា ក៏អ្នកនាងនៅតែឆ្លៀតពេលវេលាពេលព្រឹកៗ ដើម្បីធ្វើការហាត់ប្រាណជារៀងរាល់ព្រឹក រយៈពេល១៥នាទី។
បំណងសម្រាប់ថ្ងៃអនាគត
បំណងសម្រាប់ថ្ងៃអនាគតនោះគឺអ្នកនាងចង់ឱ្យទស្សនិកជននៅតែបន្ដការគាំទ្រអ្នកនាងជារៀងរហូតនិងទី២ប្រាថ្នាចង់បាន បុត្រីមួយរូបបន្ថែមទៀតនៅឆ្នាំនេះ ដែលសព្វថ្ងៃអ្នកនាងមានបុត្រាមួយរួចទៅហើយ។
បណ្ដាំផ្ញើរបស់ម៉េង កែវពេជ្ជតា
សូមមិត្ដអ្នកអានទាំងអស់គ្នាយកចិត្ដទុកដាក់ចំពោះសុខភាពក៏ដូចជាសម្រស់របស់ខ្លួនឱ្យបានល្អទើបធ្វើឱ្យលោកអ្នកទទួល បាននូវអ្វីដែលល្អក្នុងជីវិត។ កាលណាលោកអ្នកមានសុខភាពល្អ នោះអ្វីៗវាល្អតាមពីក្រោយជានិច្ច ទាំងការងារទាំងមុខរបររកស៊ី។ សម្រស់ជាផ្នែកមួយយ៉ាងសំខាន់ចំពោះមិត្ដនារីៗ ដូច្នេះត្រូវចេះថែរក្សាសម្រស់របស់ខ្លួនឱ្យបានល្អដើម្បីជាទីពេញចិត្ដដល់អ្នកផងទាំង ពួងដែលនៅជុំវិញខ្លួនយើង។
ការរៀបរាប់ជូនខាងលើនេះ ជាការយល់ឃើញ និងជាការអនុវត្ដរបស់អ្នកនាង ម៉េង កែវពេជ្ជតា តែប៉ុណ្ណោះ។ សូម លោកស្រីអ្នកនាងកញ្ញាជ្រើសរើសយកអ្វីដែលលោកអ្នកយល់ថាល្អត្រឹមត្រូវសម្រាប់អនុវត្ដបានហើយ។
ប្រវត្ដិរូបសង្ខេប
- ឈ្មោះ ៖ ម៉េង កែវពេជ្ជតា
- អាយុ ៖ ៣២ឆ្នាំ
- កម្ពស់ ៖ ១,៥៦ម៉ែត្រ
- ចង្កេះ ៖ ២៧
- ទម្ងន់ ៖ ៥៣គីឡូក្រាម
- បងប្អូន ៖ ៤នាក់ ស្រី៣នាក់ និងប្រុស១នាក់(ជាកូនទី៤ )
- កម្រិតវប្បធម៌ ៖ បញ្ចប់បាក់ឌុប
- អាជីពបច្ចុប្បន្ន ៖ តារាចម្រៀង
- ទីកន្លែងកំណើត ៖ ខេត្ដតាកែវ
ប្រភព ៖ ទស្សនាវដ្តី សុខភាពយើង លេខ០២៩ ខែមិថុនា ឆ្នាំ២០០៨
Leave a Reply