បើកាលណាគេនិយាយដល់បទចម្រៀងរេប(RAP) និងហ៊ីបហប់គេតែងនឹកឃើញភ្លាមដល់ពូឃ្លាំងអាណិកជនខ្មែរនៅ សហរដ្ឋអាមេរិក។ ពូឃ្លាំងនេះហើយដែលធ្វើឱ្យបទចម្រៀងរេប(RAP)ខ្មែរមានការគាំទ្រពេញនិយមពីសំណាក់មិត្ដយុវវ័យ។ម្យ៉ាងវិញទៀតនោះរាល់បទចម្រៀងដែលពូឃ្លាំងនិពន្ធឡើងគឺភាគច្រើនមានអត្ថន័យអប់រំដល់កូនខ្មែរគ្រប់រូបពិសេសយុវជនឱ្យចេះ ស្រឡាញ់កេរដំណែលវប្បធម៌ ស្រឡាញ់ជាតិមាតុភូមិ ចេះកែខ្លួនស្គាល់ខុសត្រូវនិងមានសីលធម៌។ទោះបីជាមមាញឹកនឹងវិស័យសិល្បៈនេះខ្លាំងយ៉ាងណាក៏ដោយក៏ពូឃ្លាំងមិនដែលភ្លេចហើយតែងយកចិត្ដទុកដាក់ចំពោះបញ្ហាសុខភាពផ្ទាល់ខ្លួនរបស់គាត់ដែរ។ នេះហើយដែលធ្វើឱ្យពូឃ្លាំងមានសុខភាពល្អនិងកាន់តែមានមន្ដស្នេហ៍ទទួលបានការគាំទ្រកាន់តែច្រើនឡើងៗពីសំណាក់មិត្ដយុវវ័យ។
ដើម្បីស្វែងយល់ពីអាថ៌កំបាំងនៃការថែរក្សាសុខភាព និងសម្រស់របស់ពូឃ្លាំង ទស្សនាវដ្ដី សុខភាពយើងបានជួបជាមួយ លោក ដើម្បីទទួលយកការបកស្រាយការពិតទាំងនេះ។ ពូឃ្លាំងជាបុគ្គលម្នាក់កំពុងតែមានឈ្មោះបោះសម្លេងក្នុងវិស័យសិល្បៈ ដូចនេះ គាត់ចៀសមិនផុតអំពីការថែរក្សានូវសម្រស់របស់គាត់ដើម្បីឱ្យរូបគាត់កាន់តែទាក់ទាញនិងមានអ្នកគាំទ្រច្រើននោះទេ។ មិនដឹងថា តើពូឃ្លាំងមានអាថ៌កំបាំងក្នុងការថែរក្សាសម្រស់របស់គាត់ឬយ៉ាងណានោះទេបានជាគាត់មានមន្ដស្នេហ៍ម្ល៉េះ?
ប្រវត្ដិមុនចូលសិល្បៈ
ដោយសារមាននិស្ស័យជាមួយសិល្បៈ ជាពិសេសវិស័យចម្រៀងរេបនេះតែម្ដងបានធ្វើឱ្យពូឃ្លាំងម្នាក់នេះចាប់ផ្ដើមឈាន ជើងចូលតាំងពីគាត់នៅវ័យជំទង់មកម្ល៉េះ ពោលគឺកាលពី១៥ឆ្នាំមុន។ ប៉ុន្ដែមិនបានសមតាមបំណងព្រោះត្រូវទៅរស់នៅឯសហរដ្ឋ អាមេរិក ដោយមានមុខរបរជាអ្នកកែសម្ផស្ស។ នៅឆ្នាំ២០០៥ ទើបលោកត្រឡប់មកកម្ពុជាជាថ្មីហើយចាប់ផ្ដើមប្រឡូកក្នុងសិល្បៈ ចម្រៀង Rap នេះ។
ការថែរក្សាសម្រស់
មនុស្សគ្រប់រូបមិនដែលមាននរណាម្នាក់ប្រាថ្នារូបសម្បត្ដិមិនល្អប្រសើរនោះទេ។ គេតែងប្រាថ្នាចង់ឱ្យរូបសម្ផស្សរបស់គេជា ទីពេញចិត្ដនៃអ្នកផងទាំងពួង។ ម្យ៉ាងទៀតបើកាលណាមានភាពមិនប្រក្រតីកើតឡើងចំពោះរូបសម្ផស្សរបស់គេហើយនោះ គេតែង រិះរកគ្រប់មធ្យោបាយដើម្បីធ្វើការកែខៃឱ្យមានសោភ័ណភាពវិញមិនតែប៉ុណ្ណោះគេមិនដែលភ្លេចក្នុងការយកចិត្ដទុកដាក់ថែរក្សា ការពារចំពោះរូបសម្បត្ដិដែលអំណោយផលពីធម្មជាតិស្រាប់របស់គេនោះផងទេ។
- ការថែរក្សាស្បែកមុខ ៖ ពុំមានអ្វីប្លែកនោះទេ ចំពោះភាពខុសគ្នារវាងមនុស្សយើងម្នាក់ៗក្នុងការថែរក្សាសម្រស់របស់ខ្លួន ផ្ទាល់។ អ្នកខ្លះចូលចិត្ដប្រើប្រាស់នូវផលិតផលសម្អាងកាយនានា ដូចជាម្សៅ ឡេជាដើមក៏ប៉ុន្ដែនៅតែមិនទទួលបាននូវលទ្ធផលធ្វើឱ្យ ស្បែកមុខរបស់ខ្លួនស្រស់ស្អាតនោះទេ។ អ្នកខ្លះទៀតមិនដែលប្រើប្រាស់នូវផលិតផលជំនួយអ្វីនោះទេតែផ្ទុយទៅវិញផ្ទៃមុខរបស់គេ នៅតែរលោង គ្មានមុន គ្មានអាចម៍រុយអ្វីទាំងអស់។ ជាក់ស្ដែងពូឃ្លាំងតែម្ដងលោកបានបង្ហើបប្រាប់យើងថាចំពោះស្បែកមុខរលោង គ្មានមុនរបស់គាត់ គឺគាត់មិនដែលបានប្រើប្រាស់ផលិតផលជំនួយឬធ្វើការកែច្នៃនោះទេ។ ភាពស្រស់ស្អាតនេះគឺបានមកដោយ ធម្មជាតិតែម្ដង ដែលជាមោទនភាពសម្រាប់ខ្លួនគាត់ផ្ទាល់និងជាបំណងប្រាថ្នានៃអ្នកផងទាំងពួង។
- ការថែរក្សាស្បែកដងខ្លួន ៖ រីឯស្បែកដងខ្លួនវិញក៏មិនមានបញ្ហាចោទចំពោះពូឃ្លាំងដែរគឺគាត់មិនដែលភ័យព្រួយបារម្ភ អំពីបញ្ហានេះទេ ព្រោះតែខ្លួនគាត់មានអំណោយផលពីធម្មជាតិស្រាប់តែម្ដង។ រាល់ពេលដែលលោកចេញទៅសម្ដែងឬធ្វើដំណើរទៅ ខាងក្រៅម្ដងៗ លោកក៏មិនដែលប្រើប្រាស់ផលិតផលជំនួយនោះដែរដោយគ្រាន់តែមានប្រើផលិតផលសម្រាប់បំបាត់ក្លិនខ្លួន ដូចជា ទឹកអប់ជាដើមតែប៉ុណ្ណោះ។
- ការថែរក្សាសក់ ៖ បញ្ហានេះលោកបានជម្រាបថា លោកតែងកក់សក់ជារឿយៗ ហើយជួនកាលលោកធ្វើការអប់ឬពន្លា ផងដែរ ដើម្បីឱ្យសរសៃសក់ត្រង់ល្អ។ លោកមិនចូលចិត្ដលេងម៉ូតសក់តាមរបៀបក្មេងសម័យនោះទេប៉ុន្ដែលោកចូលចិត្ដអ្វីដែលប្លែក។ មានន័យថាលោកចូលចិត្ដទុកសក់វែង ហើយនៅពេលដែលលោកគិតថាវាស៊ាំហើយនោះលោកតែងកាត់វាឱ្យខ្លីម្ដងវិញ។
- ការថែរក្សាភ្នែក ៖ សម្រាប់អាជីពជាអ្នកសិស្បៈចម្រៀង និងសម្ដែងផ្ទាល់ផងនោះ តែងត្រូវធ្វើដំណើរក្រោមកម្ដៅព្រះអាទិត្យ និងមានធូលីហុយច្រើន។ ហេតុនេះហើយទើបពូឃ្លាំងតែងប្រើប្រាស់នូវវ៉ែនតាសម្រាប់ការពារភ្នែករបស់គាត់។ លើសពី នេះទៅទៀតនោះ លោកក៏បានប្រើថ្នាំសម្រាប់បន្ដក់លាងសម្អាតភ្នែករបស់គាត់ផងដែរ។
រូបភាពទស្សនាវដ្ដីសុខភាពយើង
ការថែរក្សាសុខភាពរាងកាយ
សុខភាព និងសម្រស់គឺត្រូវតែដើរទន្ទឹមគ្នា។ សម្រស់ស្រស់ស្អាត គឺទាល់តែខ្លួនមានសុខភាពល្អបរិបូរណ៍ហេតុនេះហើយ បានជាពូឃ្លាំងមិនដែលធ្វេសប្រហែសក្នុងការថែរក្សាសុខភាពរបស់គាត់នោះទេបើទោះបីជាមមាញឹកយ៉ាងណាក៏ដោយ។
- សុខភាពមាត់ធ្មេញ ៖ បញ្ហាក្លិនមាត់គឺជារឿងសំខាន់សម្រាប់មនុស្សគ្រប់រូប ដែលត្រូវធ្វើការទំនាក់ទំនងជាមួយមហាជននៅខាងក្រៅច្រើន ជាពិសេសអ្នកសិល្បៈនេះផ្ទាល់តែម្ដង។ វាអាចជាកត្ដាមួយដែលរួមចំណែកធ្វើឱ្យការងាររបស់យើងទទួល បានជោគជ័យ ឬបរាជ័យ។ ដូច្នេះហើយទើបពូឃ្លាំងខិតខំយកចិត្ដទុកដាក់ក្នុងការថែរក្សា និងសម្អាតវា។ លោកបានប្រាប់ថា ដើម្បីការពារកុំឱ្យធ្មេញពុក ឬខូចលោកតែងធ្វើការលាងសម្អាតជានិច្ចនៅក្រោយពេលដែលលោកបរិភោគអាហាររួច គឺមានន័យថា យ៉ាងហោចណាស់៣ដងក្នុងមួយថ្ងៃ។ លើសពីនេះទៅទៀតលោកក៏បានប្រើទឹកខ្ពុរមាត់ជាប្រចាំដើម្បីកុំឱ្យមាត់មានក្លិនមិនល្អផង ដែរ។
- ការទទួលទានចំណីអាហារ ៖ ក្រៅពីទទួលទានសាច់ និងបន្លែហើយនោះពូឃ្លាំងចូលចិត្ដញ៉ាំផ្លែឈើច្រើនដែលធ្វើឱ្យ ស្បែករបស់គាត់កាន់តែមានសុខភាពល្អ។
- ការលេងកីឡា ៖ ជាទូទៅពូឃ្លាំងមិនសូវចូលចិត្ដលេងកីឡានោះទេ ដោយសារពុំសូវមានពេលវេលាគ្រប់គ្រាន់។ ប៉ុន្ដែពូឃ្លាំងយល់ថាការច្រៀងរាំនេះក៏ជាកីឡាមួយប្រភេទផងដែរ ដែលអាចធ្វើឱ្យពូឃ្លាំងបង្ហូរញើស បញ្ចេញជាតិពុលដូចគ្នាទៅនឹង ការលេងបាល់ ការហែលទឹក ការរត់ជាដើម។
- ការទទួលទានដំណេក ៖ ជាទូទៅដោយសារការរវល់ទៅនឹងការងាររបស់គាត់ពូឃ្លាំងទទួលទានដំណេកបានត្រឹមតែ៦ ម៉ោងប៉ុណ្ណោះក្នុងមួយថ្ងៃ។ រយៈពេលនៃការទទួលទានដំណេកនេះបានក្លាយទៅជាទម្លាប់មួយសម្រាប់ពូឃ្លាំងទៅហើយ។
បំណងទៅថ្ងៃអនាគត
ដោយសារបច្ចុប្បន្ននេះពូឃ្លាំងគឺជាអាណិកជនខ្មែរនៅសហរដ្ឋអាមេរិកហើយដោយសារការស្រឡាញ់ជាតិមាតុភូមិចង់មក រស់នៅលើទឹកដីកម្ពុជាវិញនោះ លោកបានប្រាប់ថានៅថ្ងៃអនាគត លោកចង់មានផ្ទះនិងមានឡានផ្ទាល់ខ្លួនសម្រាប់រស់នៅទីក្រុង ភ្នំពេញនេះតែម្ដង។
បណ្ដាំផ្ញើរបស់ពូឃ្លាំង
សូមបងប្អូនជនរួមជាតិខ្មែរទាំងអស់យកចិត្ដទុកដាក់ចំពោះបញ្ហាសុខភាពផ្ទាល់ខ្លួនព្រោះបើកាលណាសុខភាពល្អនោះ ជីវិតនឹងបានរីករាយ ជីវភាពក៏បានធូរស្រាលមួយកម្រិតផងដែរ។ សូមធ្វើការស្វែងយល់ពីបញ្ហាសុខភាពឱ្យបានច្រើនតាមរយៈការ អាន ការស្ដាប់ និងការទស្សនាទូរទស្សន៍នានាដែលមានកម្មវិធីអប់រំសុខភាព។
ប្រវត្ដិរូបសង្ខេប
- អាយុ ៖ ២៩ឆ្នាំ
- កម្ពស់ ៖ ១,៧៦ម៉ែត្រ
- ទម្ងន់ ៖ ៧៦គីឡូក្រាម
- បងប្អូន ៖ ៤នាក់ ជាកូនទីបី
- អាជីពការងារ ៖ អ្នកចម្រៀងរេប
- កម្រិតវប្បធម៌ ៖ មហាវិទ្យាល័យកែសម្ផស្ស
ប្រភព ៖ ទស្សនាវដ្តី សុខភាពយើង លេខ៣១ ខែសីហា ឆ្នាំ២០០៨
Leave a Reply