ការផ្លាស់ប្ដូរនៃទម្រង់ម៉ូតសម្លៀកបំពាក់ត្រូវបានកែច្នៃឡើងជាម៉ូតផ្សេងៗប្លែកៗ និងទាន់សម័យសម្រាប់បំពេញនូវតម្រូវ ការស្លៀកពាក់របស់យុវវ័យដែលចូលចិត្ដភាពស៊ីវីល័យ។ សម្លៀកបំពាក់គឺជាវត្ថុនៅលើខ្លួនយើងដំបូង ដែលធ្វើឱ្យអ្នកជុំវិញខ្លួន យើងផ្ដោតអារម្មណ៍ និងសម្លឹងមើលមកយើងដោយសារភាពទាក់ទាញនៃម៉ូតសម្លៀកបំពាក់ដែលមានភាពស្រស់ស្អាត បូករួមជាមួយ ភាពសក្ដិសមយ៉ាងឥតខ្ចោះនៃដងខ្លួន។ ការជ្រើសរើសសម្លៀកបំពាក់ជារឿងសាំញ៉ាំ ដែលយុវវ័យមិនអាចមើលរំលង និងត្រូវយកចិត្ដ ទុកដាក់។
សារៈសំខាន់នៃសម្លៀកបំពាក់
របៀបនៃការស្លៀកពាក់គឺជាសារមួយដែលបញ្ជូនទៅក្នុងចិត្ដគំនិតមនុស្សជុំវិញខ្លួនយើង និងប្រាប់ពួកគេថា យើងជាអ្នក ណា មានចរិតដូចម្ដេច ជាមនុស្សប្រភេទណា រស់នៅក្នុងសង្គមគ្រួសារណា និងមានការអប់រំកម្រិតណា។ ការជ្រើសរើសសម្លៀក បំពាក់ឱ្យបានសមស្រមជាបញ្ហាកង្វល់មួយសម្រាប់យុវវ័យទាំងអស់ ដែលស្រឡាញ់នូវភាពស្រស់ស្អាតនៃរូបរាងកាយ សម្លៀកបំពាក់ មិនគ្រាន់តែប្រើសម្រាប់បិទបាំងរាងកាយនោះទេ! វាថែមជាគ្រឿងលម្អជួយបង្កើនសម្រស់បានមួយផ្នែកទៀត។
សម្លៀកបំពាក់យុវវ័យ
សម្លៀកបំពាក់របស់យុវវ័យនៅក្នុងឆ្នាំថ្មី ត្រូវបានរចនាម៉ូតឱ្យមានភាពស្រស់ស្អាត និងប្លែកជាងឆ្នាំមុន។ បច្ចុប្បន្ននេះ ការនិយមនូវម៉ូតសម្លៀកបំពាក់កំពុងតែមានសន្ទុះយ៉ាងខ្លាំង មានន័យថាការលេងម៉ូត ការរើសសាច់ក្រណាត់ ពណ៌ខោអាវ និងស្បែក ជើងសុទ្ធតែមានភាពស៊ីវីល័យនិយមទាំងអស់ ហើយសមស្របតាមកាលៈទេសៈ។ យុវវ័យទាំងអស់មិនថាជាអ្នកដែលចូលចិត្ដ សម្លៀកបំពាក់បែបស៊ីវីល័យ ឬក៏បែបទាន់សម័យដែលមានលក្ខណៈសុភាពរាបសារក៏ដោយ គឺសុទ្ធសឹងតែអាចរកបាននូវសម្លៀក បំពាក់ដែលខ្លួនត្រូវការបានយ៉ាងងាយ ព្រោះតែការច្នៃម៉ូតរបស់ជាងកាត់ដេរ។ ប៉ុន្ដែការស្លៀកពាក់ឱ្យបានសមរម្យ និងត្រូវ ទៅតាមរូបរាងរបស់អ្នកប្រើ នៅតែជាបញ្ហាលំបាកសម្រាប់យុវវ័យមួយចំនួន ដែលចង់បង្កើនភាពស្រស់ស្អាត និងការលេចធ្លោរបស់ ពួកគេ មិនថានៅក្នុងសកម្មភាពកម្សាន្ដ ឬក៏ពិធីផ្សេងៗនោះទេ។
សម្លៀកបំពាក់ដែលយុវវ័យគួរជ្រើសរើស
ការជ្រើសរើសសម្លៀកបំពាក់ដើម្បីឱ្យសមនឹងរូបរាងគឺជាការសំខាន់សម្រាប់យុវវ័យ។ មិនថាជាការរើសម៉ូត ឬពណ៌នោះ ទេ វាសុទ្ធសឹងតែជាភាពទាក់ទាញ។ ខាងក្រោមនេះជាវិធីខ្លះៗសម្រាប់មិត្ដយុវវ័យទាំងអស់ មិនថាអ្នកចូលចិត្ដស្លៀកពាក់បែបសិចស៊ី ឬក៏បែបទាន់សម័យធម្មតានោះទេ គឺសុទ្ធសឹងតែអាចយកវិធីទាំងនេះទៅប្រើប្រាស់ដើម្បីជាប្រយោជន៍ក្នុងការជ្រើសរើសសម្លៀក បំពាក់ ៖
1 . សម្រាប់យុវជន ៖ សុភាពបុរសទាំងឡាយ លោកអ្នកគួរតែជ្រើសនូវសម្លៀកបំពាក់ជាប្រភេទសាច់ក្រណាត់ ឬអាវយឺត ដែលមានពណ៌ឆើតបន្ដិច ជាពិសេសឱ្យវាត្រូវជាមួយសម្បុរស្បែក។ លោកអ្នកអាចជ្រើសយកពណ៌ជាច្រើនប្រភេទដែលកំពុងពេញនិយម ដូចជាពណ៌ស ស៊ីជម្ពូ ផ្កាឈូក ពណ៌ស្វាយជាដើម។ ប៉ុន្ដែត្រូវឱ្យវាស៊ីជាមួយពណ៌ខោ និងស្បែករបស់លោកអ្នក។ ទាំងនេះវាជា សម្លៀកបំពាក់ធម្មតាសម្រាប់ការកម្សាន្ដ។ ប្រសិនបើយុវវ័យត្រូវចូលរួមពិធីផ្សេងៗ លោកអ្នកចាំបាច់ជ្រើសរើសខោអាវជាប្រភេទ សាច់ក្រណាត់ដែលកាត់បញ្ចេញរាងបន្ដិចជាមួយស្បែកជើងប៊ូ ទើបមើលទៅមានភាពថ្លៃថ្នូរ និងសក្ដិសមក្នុងពិធី។ សូមចងចាំថា ការជ្រើសយកស្បែកជើងប៊ូវាប្រសើរជាងការពាក់ស្បែកជើងប៉ាតតាក្នុងពិធីសំខាន់ៗ។
2 . សម្រាប់យុវនារី ៖ សុភាពនារីទាំងឡាយអ្នកនាងកញ្ញាគួរតែដឹងថា រូបរាងកាយរបស់អ្នកនាងកញ្ញាគឺជាវត្ថុដ៏ពិសិដ្ឋ ដែលទទួលបានតាំងពីកំណើត។ ដូចនេះរាល់ការស្លៀកពាក់ចាំបាច់បំផុតត្រូវតែមានភាពស្រស់ស្អាត និងទាក់ទាញសមតាមបែប យុវវ័យថ្លៃថ្នូរ។ សុភាពនារីទាំងអស់អាចជ្រើសរើសការស្លៀកពាក់បែបសាមញ្ញ ដូចជាអាវយឺត ខោខូវប៊យជើងវែង ឬខ្លីទៅតាមម៉ូត និងពណ៌ដែលចូលចិត្ដ សម្រាប់ការស្លៀកពាក់ធម្មតាប្រចាំថ្ងៃ។ ប៉ុន្ដែបើសិនជាអ្នកនាងកញ្ញាមានកម្មវិធីផ្សេងៗ នោះយុវនារីទាំង ឡាយរើសយកសម្លៀកបំពាក់ ដូចជារ៉ូបវែង ឬខ្លីត្រឹមជង្គង់ក៏បាន ឱ្យតែមានពណ៌ស្រស់ឆើតស្របតាមចំណូលចិត្ដរបស់អ្នកនាងកញ្ញា តែសំខាន់ពណ៌ដែលត្រូវនឹងសាច់របស់អ្នកនាងកញ្ញាទៅវាជាការស្រេច។ ដើម្បីបន្ថែមនូវភាពស្រស់ស្អាត និងភាពទាក់ទាញរបស់មិត្ដ យុវនារីថែមទៀតនោះ សូមលម្អជើងដោយស្បែកជើងកែងចោទ និងកាបូបយួរដែលសក្ដិសមជាមួយសម្លៀកបំពាក់របស់អ្នកនាង កញ្ញាទាំងឡាយ។
ដំបូន្នានអ្នកជំនាញ
សម្លៀកបំពាក់ជាកត្ដាសំខាន់ក្នុងការលើកកម្ពស់រូបសម្រស់ខាងក្រៅរបស់មនុស្ស។ ដូចនេះយុវវ័យគ្រប់រូបគួរតែជ្រើសរើស សម្លៀកបំពាក់ណាដែលមានភាពទាក់ទាញ និងទាន់សម័យសង្គម។ ប៉ុន្ដែលោកអ្នកត្រូវគិតថា សង្គមជាតិយើងប្រកាន់ទំនៀមទម្លាប់ យ៉ាងដូចម្ដេច លោកអ្នកអាចជ្រើសរើសនូវសម្លៀកបំពាក់ដែលស្រស់ស្អាតជាច្រើនប្រភេទ ដែលធ្វើឱ្យខ្លួនមានភាពស៊ីវីល័យ ហើយ សក្ដិសមទៅនឹងវប្បធម៌របស់យើង។
ប្រភព ៖ ទស្សនាវដ្តី សុខភាពយើង លេខ៤០ ខែឧសភា ឆ្នាំ២០០៩
Leave a Reply