ចំពោះមូលហេតុដែលបណ្ដាលឱ្យមានការវៀចខ្ទង់ច្រមុះ អាចកើតមានឡើងតាំងពីកំណើតស្រាប់ និងអាចបណ្ដាលមកពី ការប៉ះទង្គិចខាងក្រៅ ដូចជាគ្រោះថ្នាក់ចរាចរណ៍ជាដើម។ ម្យ៉ាងវិញទៀត ចំពោះអ្នកដែលចូលចិត្ដធ្វើការកែសម្ផស្ស ធ្វើឱ្យខ្ទង់ច្រមុះ មានសភាពខ្ពស់ត្រង់ ឬកោងល្អ ឬធ្វើឱ្យច្រមុះស្រួច ក៏អាចប្រឈមមុខទៅនឹងបញ្ហាវៀចខ្ទង់ច្រមុះនេះបានដែរ ដោយសារតែការធ្វេសប្រហែសរបស់អ្នកជំនាញនៅក្នុងពេលធ្វើការវះកាត់។ ម្យ៉ាងវិញទៀតប្រការនេះអាចកើតមាននៅពេលដែលអ្នកជំនាញមិនបានធ្វើការវិភាគឱ្យបានច្បាស់លាស់មុនពេលធ្វើការវះកាត់។
បើតាមការសង្កេតមើលរោគសញ្ញាដំបូង អ្នកជម្ងឺមានអាការរមាស់ក្នុងរន្ធច្រមុះ រកកលកណ្ដាស់ ដែលមានសភាពដូចជា ជម្ងឺផ្ដាសាយ។ បន្ទាប់មកអ្នកជម្ងឺតែងតែតឹងច្រមុះ(តឹងខាងខ្ទង់ច្រមុះប៉ោងឡើង) និងមានអាការដូចជាពិបាកនៅក្នុងការដកដង្ហើម ចេញចូល ឈឺក្បាល ហៀរសម្បោរថ្លាៗ ឬវិលមុខជាដើម។
វិធីព្យាបាលវៀចខ្ទង់ច្រមុះ
វិធីសាស្ដ្រនៅក្នុងការព្យាបាលគឺអាស្រ័យទៅលើសភាពជាក់ស្ដែងដែលបង្កឱ្យមានផលវិបាកទៅលើអ្នកជម្ងឺម្នាក់ៗ។
1. ករណីទី១ ៖ ប្រសិនបើការវៀចខ្ទង់ច្រមុះនេះមិនបណ្ដាលឱ្យមានបញ្ហាខ្លាំងក្លាទៅដល់អ្នកជម្ងឺនោះទេ គឺគេគ្រាន់តែប្រើ ថ្នាំបន្ដក់ចូលទៅក្នុងរន្ធច្រមុះដើម្បីជួយបន្ធូរច្រមុះ និងសម្រួលដល់ការដកដង្ហើមជាស្រេច។
2. ករណីទី២ ៖ នៅពេលដែលអ្នកជំនាញពិនិត្យឃើញថា ការវៀចខ្ទង់ច្រមុះបណ្ដាលឱ្យមានការរលាកដល់ដុំសាច់ច្រមុះ (កកណេ ឬធួរទីណេត) ឬអាចអាលែស្ស៊ី នោះអ្នកជំនាញអាចប្រើវិធីសាស្ដ្រព្យាបាលបញ្ហាទាំងនោះទៅតាមបច្ចេកទេស និងជំនាញផ្ទាល់ខ្លួន ដើម្បីកែខៃ និងលុបបំបាត់នូវរាល់បញ្ហាទាំងអស់នោះ។
3. ករណីទី៣ ៖ ក្នុងខណៈពេលដែលអ្នកជំនាញធ្វើការព្យាបាលទៅតាមវិធីសាស្ដ្រទាំងពីរករណីខាងលើ នៅតែពុំអាច ទទួលបានលទ្ធផលវិជ្ជមានទៀត នោះអ្នកជំនាញចាំបាច់ត្រូវតែអនុវត្ដវិធីសាស្ដ្រវះកាត់ ដើម្បីដាប់យកឆ្អឹងខ្ទង់ច្រមុះណាដែលវៀច ឬកោងនោះចេញ ដើម្បីបើកឱ្យរន្ធច្រមុះទូលាយ ងាយស្រួលក្នុងការដកដង្ហើម និងមិនបណ្ដាលឱ្យកើតមានបញ្ហាទៅថ្ងៃក្រោយ។
ផលវិបាកដែលបណ្ដាលមកពីវៀចខ្ទង់ច្រមុះ
អ្នកជម្ងឺដែលមានការវៀចខ្ទង់ ឬក្ដោងច្រមុះក្នុង ឬក្រៅក្ដី តែងតែមានការប៉ះពាល់ដល់់អារម្មណ៍របស់អ្នកជម្ងឺ និងមាន អាការខុសប្លែកពីគ្នា ទៅតាមទ្រង់ទ្រាយនៃការវៀចខ្ទង់នោះ។ ផលវិបាកនៃការវៀចខ្ទង់ច្រមុះ មានដូចជាធ្វើឱ្យអ្នកជម្ងឺមានអាការ រមាស់នៅក្នុងច្រមុះ រកកលកណ្ដាស់ ពិបាកនៅក្នុងការដកដង្ហើមចេញចូល ឈឺក្បាល ហៀរសម្បោរថ្លាៗ តឹងច្រមុះ ឬវិលមុខ ជា ពិសេសក៏អាចបណ្ដាលឱ្យអ្នកជម្ងឺមានរលាកច្រមុះអាលែស្ស៊ី កើតហឺត ឬការរលាកផ្សេងៗទៀត។ លើសពីនេះទៅទៀត វាក៏អាច បណ្ដាលឱ្យមានការរលាកស៊ីនុសបានថែមទៀតផង ប្រសិនបើពុំបានទទួលការព្យាបាលទាន់ពេលវេលា។
វិធីការពារវៀចខ្ទង់ច្រមុះ
ដើម្បីចៀសវាងកុំឱ្យមានការវៀចខ្ទង់ច្រមុះ ដែលនាំឱ្យបាត់បង់សម្រស់ដ៏ផូរផង់ និងប៉ះពាល់ទៅដល់សុខភាពរបស់លោក អ្នក ប្រការល្អគួរគប្បីមានការប្រុងប្រយ័ត្នចំពោះគ្រោះថ្នាក់ផ្សេងៗ ឬហេតុការណ៍ទាំងឡាយណាដែលអាចធ្វើឱ្យប៉ះពាល់ទៅដល់ខ្ទង់ ច្រមុះ។ ជាពិសេសត្រូវមានការពិគ្រោះយោបល់ពីគ្រូពេទ្យជំនាញនៅពេលដែលមានការសង្ស័យថា ខ្ទង់ច្រមុះរបស់ខ្លួនខុសប្រក្រតី ដើម្បីរកដំណោះស្រាយ និងទទួលការព្យាបាលជាបន្ទាន់។ ចៀសវាងការទុកបង្អង់យូរ ដែលអាចនាំឱ្យមានការរីករាលដាលនៃជម្ងឺ ជា ហេតុធ្វើឱ្យពិបាកក្នុងការព្យាបាល។
ដំបូន្មានអ្នកឯកទេស
ចំពោះការវៀចខ្ទង់ ឬក្ដោងច្រមុះ ភាគច្រើនពុំអាចបណ្ដាលឱ្យគ្រោះថ្នាក់ធ្ងន់ធ្ងរ ឬប៉ះពាល់ទៅដល់សុខភាពនោះទេ។ ប៉ុន្ដែទោះបីជាវាមិនអាចបង្កឱ្យមានផលវិបាកយ៉ាងណាក៏ដោយ ពេលដែលជួបប្រទះជាមួយនឹងបញ្ហាទាំងនេះ គប្បីត្រូវយកចិត្ដទុក ដាក់តំហែទាំ ដើម្បីចៀសវាងការរីករាលដាលនៃជម្ងឺ ដែលជាហេតុធ្វើឱ្យបញ្ហាតូចក្លាយទៅជាបញ្ហាធំចំពោះសុខភាព។ ជាពិសេសត្រូវ ទៅពិនិត្យនៅតាមបណ្ដាគ្លីនិក ឬអ្នកជំនាញផ្សេងៗ ដើម្បីឱ្យដឹងច្បាស់ និងទទួលនូវការព្យាបាល។
ប្រភព ៖ ទស្សនាវដ្តី សុខភាពយើង លេខ៣៦ ខែមករា ឆ្នាំ២០០៩
Leave a Reply