• បរិមាណមនុស្សទទួលទាន ៖ ២នាក់
• រយៈពេលចម្អិន ៖ ៤នាទី
• រយៈពេលរៀបចំគ្រឿងផ្សំ ៖ ៥០នាទី

គ្រឿងផ្សំ

• សាច់ជ្រូកសាច់លាយខ្លាញ់ ១២០ក្រាម
• ខ្ទឹមស ៤កំពឹស
• ស្ករត្នោត ១ស្លាបព្រាកាហ្វេ
• ទឹកត្រី ២ស្លាបព្រាកាហ្វេ
• អំបិល ១ចឹប
• ម្រេច ១ចឹប
• ត្រយូងចេក ១កំណាត់
• សណ្ដែកកួរ ៨០ក្រាម
• ខ្ទឹមក្រហម ៤០ក្រាម
• សណ្ដែកដី ២០ក្រាម
• សណ្ដែកបណ្ដុះ ៤០ក្រាម
• ជីគ្រប់មុខ តាមចំណូលចិត្ដ
• ផ្កាកំប្លោក តាមចំណូលចិត្ដ
• បង្គាក្រៀម ៣០ក្រាម
• ទឹកខ្មេះ ២ស្លាបព្រាកាហ្វេ
• ស្ករស ១ស្លាបព្រាកាហ្វេ
• ម្ទេស ២គ្រាប់
• ក្រូចឆ្មារ ២ចំណិត

របៀបរៀបចំគ្រឿងផ្សំ

• ខ្ទឹមក្រហមចែកជាពីរ យកពាក់កណ្ដាល​ទៅចិញ្ច្រាំ និងពាក់កណ្ដាល​ទៀតហាន់​ស្ដើងល្មម
• ខ្ទឹមសចិញ្ច្រាំឱ្យម៉ដ្ឋ
• ខ្ទឹមក្រហមដែលចិញ្ច្រាំម៉ដ្ឋនោះយក​មកលាយ​ជាមួយ​ស្ករត្នោត ទឹកត្រី និងក្រូចឆ្មារ​(នេះជាទឹកជ្រលក់)​
• សាច់ជ្រូកលាងទឹកឱ្យស្អាត យកទៅប្រឡាក់​ជាមួយ​ខ្ទឹមស​ដែល​ចិញ្ច្រាំរួច ហើយត្រូវ​លាយជាមួយ​ស្ករត្នោត និងទឹកត្រី ទុក​ដោយឡែក។ បន្ទាប់មក​គឺត្រូវយក​ទៅចៀន រួចហាន់​តូចៗល្មម​ទុកដោយ​ឡែក។
• ត្រយូងចេកបកសម្បកចេញយកតែ​បណ្ដូល​កណ្ដាល ហើយយក​ទៅត្រាំ​ជាមួយ​ទឹកខ្មេះ ឬក៏​ទឹកក្រូចឆ្មារ​ប្រហែល​ជាពី​ ៥ទៅ​១០នាទី​ បន្ទាប់មក​សូមយក​ត្រយូងចេក​ហាន់ស្ដើង​ទុកដោយ​ឡែក។
• ជីគ្រប់មុខបេះយកតែស្លឹក ហើយ​លាងទឹក​ឱ្យស្អាត
• សណ្ដែកកួរលាងទឹកឱ្យ​ស្អាតហើយ​កាត់ខ្លី​ល្មម
• សណ្ដែកបណ្ដុះលាង​ទឹកឱ្យ​ស្អាត
• បង្គាក្រៀមលាង​ទឹកឱ្យ​ស្អាត
• ម្ទេសក្រហម ហាន់ជា​សរសៃ​សម្រាប់​លម្អ។

របៀបធ្វើ

ដំបូងយកបន្លែមកលាយចូលគ្នា ដែល​រួមមាន ត្រយូងចេក សណ្ដែកបណ្ដុះ ជីគ្រប់មុខ សណ្ដែកកួរ បង្គាក្រៀម ខ្ទឹមក្រហម សាច់ជ្រូក​ដែលហាន់​រួចដាក់​ស្ករស ទឹកខ្មេះ សណ្ដែកដី ម្រេច អំបិល ទឹកត្រី លាយចូលគ្នាឱ្យ​ចូលជាតិ ហើយដាក់​ម្ទេស​លម្អ​ជាការ​ ​ស្រេច។ ចំណែក​ឯទឹក​ជ្រលក់​ដាក់លាយ​បន្ថែម​ពីលើ បើសិន​ជាគិត​ថាមិន​ទាន់​មាន​រសជាតិ​ល្អ។

បញ្ជាក់ ៖ ម្ហូបនេះអាចទទួលទានបាន​ជាមួយ​បាយស ឬក៏​ជាមួយ​គ្រឿងក្លែម​។