ស្បែកជាកត្ដាមួយសំខាន់សម្រាប់មនុស្សគ្រប់ៗរូប និងជាភាពទាក់ទាញមួយចំពោះមនុស្សទូទៅ។ ជាពិសេសជាងនេះទៅ ទៀត វាអាចជួយបង្កើនសម្រស់មួយភាគធំដល់មិត្ដស្ដ្រីទាំងឡាយថែមទៀតផង។ នៅប្រទេសកម្ពុជាសម្បូរទៅដោយរុក្ខជាតិ និង ផ្លែឈើជាច្រើនមុខដែលមានគុណប្រយោជន៍ចំពោះសុខភាពស្បែក ដែលមិនចាំបាច់ឱ្យលោកអ្នកចំណាយថវិកាអស់ច្រើនទៅលើ គ្រឿងសម្អាង ដែលមានតម្លៃថ្លៃ និងនាំចូលពីប្រទេសក្រៅនោះទេ។
វិធីថែរក្សាស្បែក
ការមើលថែរក្សាស្បែកជារឿងមួយដែលលោកអ្នកគួរយកចិត្ដទុកដាក់ជាទីបំផុត ជាពិសេសគឺការរក្សានូវសម្រស់ស្បែកមុខ និងស្បែកដងខ្លួនគ្រប់ទីកន្លែង។ តើលោកអ្នកមានដឹងទេថា កាលណាស្បែកមានសុខភាពល្អ អាចសបញ្ជាក់អំពីសុខភាពខ្លួនប្រាណ ទាំងមូលបាន។ ដូច្នេះដើម្បីឱ្យស្បែកលោកអ្នកក្លាយទៅជាមានពន្លឺឡើងវិញ មិត្ដអ្នកអានទាំងអស់គួរតែប្រតិបត្ដិវិធីខ្លះៗ ដែលបាន រៀបរាប់ដូចខាងក្រោមនេះ ៖
1. វិធីទី១ ៖ ចំពោះស្បែកដែលមានជាតិប្រេងច្រើន និងជាតិខ្លាញ់ច្រើន គួរជ្រើសរើសយកអំពិលទុំជាមួយទឹកដោះគោ ឆៅ ពីព្រោះអំពិលទុំក៏ជាឱសថមួយអាចធ្វើឱ្យស្បែកសទន់រលោង និងកម្ចាត់ស្នាមអុជខ្មៅផ្សេងៗដែលមានលើស្បែកបាន គ្រាន់តែ លោកអ្នកអនុវត្ដវាមួយសប្ដាហ៍ម្ដង នោះស្បែកលោកអ្នកនឹងប្រែពណ៌ទៅជាសស្រស់ស្អាតជាក់ជាមិនខានឡើយ។ ដំបូងលោកអ្នក ត្រូវងូតទឹកសម្អាតខ្លួនប្រាណឱ្យបានស្អាតជាមុនសិន ទើបយកអំពិលទុំលាយជាមួយទឹកដោះគោឆៅច្របាច់វាឱ្យសព្វចូលគ្នា។ បន្ទាប់ មកទៀត លោកអ្នកយកវាមកលាបពេញខ្លួនប្រាណ លើកលែងតែចុងសុដន់ ទុកប្រមាណជា១០នាទី ទើបលាងជម្រះនឹងទឹកធម្មតា ចេញវិញជាការស្រេច។ បើលោកអ្នកដែលមានស្បែកស្ងួត ចៀសវាងកុំប្រើវិធីនេះអី ព្រោះវាអាចធ្វើឱ្យស្បែកអ្នកកាន់តែស្ងួតជាងមុន ទៅទៀត។
2. វិធីទី២ ៖ មានវិធីមួយទៀតផងដែរ ចំពោះស្បែកមុខគ្រប់ប្រភេទ ដែលចង់បំបាត់ស្នាម និងធ្វើឱ្យផ្ទៃមុខស លោកអ្នក អាចយកសណ្ដែកបាយស្ងោរលាយនឹងប៉េងប៉ោះ និងទឹកឃ្មុំ។ គុណសម្បត្ដិរបស់សណ្ដែកបាយ ប៉េងប៉ោះ និងទឹកឃ្មុំទទួលលទ្ធផលឆាប់ រហ័សទាន់ចិត្ដ ជារូបមន្ដស្បែករលោងស្អាត(ប្រើចំពោះស្បែកមុខ) ជាពិសេសជួយសម្អាតស្បែកដែលមានស្នាមជ្រីវជ្រួញ ជាំអុជខ្មៅ និងមានកើតមុនខ្សាច់ច្រើន ព្រមទាំងស្បែកមុខខ្មៅស្រអាប់ស្រគាំ មិន-សជាដើម។ លោកអ្នកគ្រាន់តែយកសណ្ដែកបាយ១ស្លាបព្រា បាយស្ងោរឱ្យឆ្អិនល្មម កិនឱ្យម៉ដ្ឋ ប៉េងប៉ោះទុំមួយផ្លែកិនឱ្យម៉ដ្ឋ និងទឹកឃ្មុំ១ស្លាបព្រាកាហ្វេ។ បន្ទាប់មកទៀតលាយសណ្ដែកបាយ ជាមួយប៉េងប៉ោះ និងទឹកឃ្មុំបញ្ចូលគ្នា។ ប្រើទឹកក្ដៅឧណ្ហៗលុបលាងមុខឱ្យបានស្អាត ហើយជូតមុខឱ្យស្ងួតនិងរៀបចំសក់ឱ្យបានត្រឹម ត្រូវ កុំឱ្យធ្លាក់មកលើផ្ទៃមុខ។ សូមយកវាមកបំពោកឱ្យពេញផ្ទៃមុខ លើកលែងតែបរិវេណភ្នែក និងបបូរមាត់។ ទុករយៈពេល ប្រមាណជា២០នាទីទើបលាងមុខចេញដោយទឹកស្អាត ធ្វើរបៀបនេះឱ្យបាន៥ថ្ងៃម្ដង។
3. វិធីទី៣ ៖ ស្បែករបស់លោកអ្នកនឹងស្រស់ស្អាតភ្លឺថ្លាដោយធម្មជាតិ អាចប្រើបានចំពោះស្បែកស្ងួត ដែលចង់បាន សំណើមពីធម្មជាតិ។ គួរតែយកផ្លែម្នាស់ និងទឹកដោះគោឆៅ(ចំពោះស្បែកខ្លួន) ដោយយកផ្លែម្នាស់មួយចម្រៀកមកចិតជាចំណិត ច្របាច់ជាមួយទឹកដោះគោឆៅឱ្យល្មម ហើយយកមកលាបពេញខ្លួន លើកលែងតែចុងសុដន់ ទុកប្រមាណជា១០-១៥នាទី ទើបលាងចេញដោយទឹកស្អាត។ ធ្វើយ៉ាងនេះឱ្យបានមួយសប្ដាហ៍ម្ដង នោះលោកអ្នកអាចទទួលបាននូវសោភ័ណភាពស្រស់ស្អាតនៃ ស្បែកជាក់ជាមិនខានឡើយ។ វិធីនេះអាចអនុវត្ដ២ដងក្នុងមួយសប្ដាហ៍ និងប្រើបានគ្រប់ស្ថានភាពស្បែកទៀតផង។
4. វិធីទី៤ ៖ មួយវិញទៀតចំពោះគ្រប់ប្រភេទស្បែក អាចប្រើជាក្រូចពោធិ៍សាត់ និងទឹកដោះគោឆៅ ដោយយកក្រូច ពោធិ៍សាត់ចិតសម្បកចេញឱ្យស្អាត ហើយពុះទទឹងជាពីរជ្រលក់ជាមួយទឹកដោះគោឆៅលាបពេញខ្លួន ទុកប្រមាណជា១៥នាទីទើប លាងខ្លួនចេញ។ លោកអ្នកនឹងទទួលបាននូវស្បែកទន់រលោង គ្មានស្នាមអុជខ្មៅ និងក្មេងជាងវ័យទៀតផង។
5. វិធីទី៥ ៖ ចំពោះផ្ទៃមុខស្ងួត លោកអ្នកអាចយកផ្លែត្រសក់ ព្រោះថាត្រសក់ជាផ្លែឈើមួយដែលផ្ដល់សំណើមដល់ស្បែក ហើយវាក៏មានគុណប្រយោជន៍ច្រើនសម្រាប់សុខភាពស្បែកមុខ។ ចំណែកឯការធ្វើវិញនោះ វាងាយណាស់ គឺគ្រាន់តែយកផ្លែត្រសក់ ចំនួនមួយផ្លែដាក់ក្នុងទូទឹកកកឱ្យត្រជាក់ ហើយចិតជាចំណិតៗយកមកបិទមុខទុកប្រមាណជា១៥នាទី ទើបយកវាចេញ ហើយលាង មុខចេញនឹងទឹកក្ដៅឧណ្ហៗជាការស្រេច។
6. វិធីទី៦ ៖ លោកអ្នកអាចធ្វើវិធីមួយទៀតបានដោយអនុវត្ដឱ្យបាន២ទៅ៣ដងក្នុងមួយសប្ដាហ៍។ វិធីនេះអាចប្រើបាន គ្រប់ប្រភេទស្បែកទាំងអស់។ ចេកណាំវ៉ាទុំ(ផ្ទៃមុខ និងរាងកាយ) ចេកណាំវ៉ាទុំមានគុណប្រយោជន៍ច្រើនយ៉ាងណាស់សម្រាប់ មនុស្សទូទៅ មិនថាជាមនុស្សធំ ឬចំពោះក្មេងទេ។ ម្យ៉ាងវិញទៀត វាថែមទាំងធ្វើឱ្យសម្រស់ស្បែកមានភាពទន់រលោងបានទៀតផង។ ចេកទុំជាផ្លែឈើដែលងាយរកណាស់នៅមូលដ្ឋានដែលអ្នករស់នៅ។ ចំណែកវិធីធ្វើវិញនោះ ក៏មិនមានអ្វីពិបាកដែរ គឺគ្រាន់តែយក ចេកណាំវ៉ាទុំ២ទៅ៣ផ្លែបកសម្បកចេញ យកមកច្របាច់ឱ្យម៉ដ្ឋ(កុំឱ្យម៉ដ្ឋពេក) ហើយយកមកលាបលើខ្លួន ឬអាចបិទលើផ្ទៃមុខ ក៏បាន ទុកប្រហែលជា១៥នាទី លាងនឹងទឹកក្ដៅឧណ្ហៗចេញជាការស្រេច។ ម្យ៉ាងទៀតលោកអ្នកអាចច្របាច់លាយជាមួយនឹង ទឹកដោះគោឆៅក៏បានផងដែរ។
7. វិធីទី៧ ៖ ចង់ឱ្យស្បែកមានភាពស្រស់ស្អាត អាចអនុវត្ដចំពោះស្បែកគ្រប់ប្រភេទ ដោយគ្រាន់តែយកផ្លែល្ហុងទុំកិនឱ្យ ម៉ដ្ឋ១ស្លាបព្រាបាយលាយជាមួយទឹកឃ្មុំកន្លះស្លាបព្រាកាហ្វេ ច្របល់ចូលគ្នាឱ្យសព្វ ហើយលាបបំពោកលើស្បែកមុខ ទុកចោល ប្រមាណជា២០នាទី សឹមលាងមុខចេញជាមួយនឹងទឹកស្អាត។ រូបមន្ដនេះអាចជួយកម្ចាត់កោសិកាស្បែកចាស់ឱ្យជ្រុះចេញបំបាត់ភាព ក្រិនរបស់ស្បែក ធ្វើឱ្យស្បែកមុខភ្លឺថ្លា រលោងស្រស់ស្អាតគួរឱ្យបេតី។
ដំបូន្មានអ្នកជំនាញ
លោកអ្នកដែលមានសម្រស់ស្បែកមិនសូវស្អាត ស្រអាប់ ខ្មៅ ជាំជាដើម គួរតែឧស្សាហ៍អនុវត្ដវិធីខាងលើនេះ ដើម្បីធ្វើឱ្យ ស្បែកលោកអ្នកប្រែក្លាយគួរជាទីគយគន់ឡើងវិញ។ ម្យ៉ាងវិញទៀត វិធីទាំងនេះជាវិធីងាយៗដែលលោកអ្នកអាចធ្វើបាន ជាវិធីបែប ធម្មជាតិ ដែលវាមិនសូវជាមានផលប៉ះពាល់ទៅលើស្បែកខ្លាំងដូចជាការប្រើប្រាស់ឡេលាយ និងឡេដែលមានសារជាតិគីមីច្រើននោះ ទេ។ ម្យ៉ាងវិញទៀតវិធីទាំងអស់ខាងលើនេះមិនសូវចំណាយអស់ថវិកាច្រើនក្នុងការធ្វើទេ ថែមទាំងទទួលបាននូវគុណប្រយោជន៍ខ្ពស់ទៀតផង។
ប្រភព ៖ ទស្សនាវដ្តី សុខភាពយើង លេខ៣៨ ខែមិនា ឆ្នាំ២០០៩
Leave a Reply