នៅឆ្នាំ២០០៨ ជនរងគ្រោះដោយសារគ្រោះថ្នាក់ចរាចរណ៍ចំនួន២៥.៧៩៦នាក់ ជាលទ្ធផលកើតឡើងពីគ្រោះថ្នាក់ចំនួន ១០.០១៥ករណី។ មានជនរងគ្រោះ១.៦៣៨នាក់បានបាត់បង់ជីវិត(ជាមធ្យមមានមនុស្ស៤ទៅ៥នាក់បានស្លាប់ក្នុងមួយថ្ងៃ) ហើយ ៧,២២៦នាក់របួសធ្ងន់។ មានយាន២១,៣០៥គ្រឿងបានពាក់ព័ន្ធក្នុងគ្រោះថ្នាក់ចរាចរណ៍។ ចំនួនគ្រោះថ្នាក់ចរាចរណ៍មានសន្ទុះកើន ឡើងលឿនជាងកំណើនចរាចរណ៍ និងកំណើនប្រជាជន។ ចំនួនអ្នកស្លាប់ដោយគ្រោះថ្នាក់ចរាចរណ៍ផ្លូវគោកបានកើតឡើងស្ទើរតែទ្វេ្វ ដងក្នុងរយៈពេល៥ឆ្នាំចុងក្រោយនេះ។
យោងតាមរបាយការណ៍ដែលអះអាងដោយប្រព័ន្ធព័ត៌មានជនរងគ្រោះ និងគ្រោះថ្នាក់ចរាចរណ៍បានឱ្យដឹងថា អត្រាស្លាប់ ក្នុងប្រជាពលរដ្ឋ១០០.០០០នាក់បានកើនឡើងចាប់ពី១១,៧ក្នុងឆ្នាំ២០០៧ដល់១២,២នាក់នៅឆ្នាំ២០០៨។ ប៉ុន្ដែអត្រាអ្នកស្លាប់ក្នុង យានយន្ដ១០.០០០គ្រឿងដែលបានចុះបញ្ជីបានថយចុះពី១៧,៨នៅឆ្នាំ២០០៧មក១៥,១នៅឆ្នាំ២០០៨។ ទោះបីជាយ៉ាងណាក៏ដោយ ចំនួននេះនៅមានកម្រិតច្រើនជាងគោលដៅថ្នាក់ជាតិទ្វេរដង ដែលកំណត់នៅក្នុងផែនការជាតិសុវត្ថិភាពចរាចរណ៍។ នៅក្នុងទីក្រុង ភ្នំពេញ៥៣%នៃជនរងគ្រោះមានគ្រោះថ្នាក់ប៉ះទង្គិចរវាងម៉ូតូនិងយានយន្ដកង់បួន។ ផ្ទុយមកវិញមានតែ២៨%ប៉ុណ្ណោះនៃអ្នកស្លាប់ បានរងគ្រោះនៅក្នុងគ្រោះថ្នាក់ប៉ះទង្គិចរវាងម៉ូតូនិងម៉ូតូ ខណៈពេលដែល៤៩%នៃអ្នកស្លាប់ប៉ះទង្គិចរវាងម៉ូតូនិងយានយន្ដកង់បួន។
គ្រោះថ្នាក់ចរាចរណ៍មានគ្រប់ទីកន្លែង
នៅក្នុងទីក្រុងភ្នំពេញ ចំនួនអ្នកស្លាប់បានកើនឡើងស្ទើរគ្រប់ខណ្ឌ ពីឆ្នាំ២០០៧ដល់ឆ្នាំ២០០៨។ ទោះបីជាយ៉ាងណាក្ដី ការ ថយចុះបានសម្គាល់ឃើញនៅក្នុងខណ្ឌឫស្សីកែវ(៣៥%ធៀបទៅនឹងឆ្នាំ២០០៧)។ នៅក្នុងការប្រៀបធៀបរវាងឆ្នាំ២០០៧ និងឆ្នាំ ២០០៨ ចំនួនអ្នកស្លាប់នៅអំឡុងបុណ្យចូលឆ្នាំចិនបានកើនឡើង៤៥% និងបុណ្យចូលឆ្នាំខ្មែរ៥%។ នៅកម្ពុជាមានអត្រាស្លាប់ក្នុង យានយន្ដ១០.០០០គ្រឿងដែលបានចុះបញ្ជីខ្ពស់ជាងគេនៅក្នុងចំណោមប្រទេសសមាជិកអាស៊ាន។ អត្រាស្លាប់ក្នុងយានយន្ដកង់ពីរ ១០.០០០គ្រឿងដែលបានចុះបញ្ជីបានថយចុះពី១៤,៧នៅឆ្នាំ២០០៧មក១២,៦នៅឆ្នាំ២០០៨។ បើធៀបទៅនឹងឆ្នាំ២០០៧ ចំនួនអ្នក ស្លាប់នៅលើបណ្ដាញផ្លូវអាស៊ានហៃវ៉េបានកើនឡើង(២៤%នៅលើផ្លូវជាតិលេខ៤ និង៦%នៅលើផ្លូវជាតិលេខ៥) លើកលែងតែផ្លូវ ជាតិលេខ៦អាបានថយចុះ៣៤% និងផ្លូវជាតិលេខ៧ថយចុះ១៨%។ ៤៧%នៃគ្រោះថ្នាក់ចរាចរណ៍បានបង្កឡើងដោយការបើកបរក្នុង ល្បឿនលឿន និង១៤%ផ្សេងទៀតបង្កឡើងដោយការសេពគ្រឿងស្រវឹង។ អ្នកជិះម៉ូតូតំណាងឱ្យអ្នកប្រើប្រាស់ផ្លូវខ្ពស់ជាងគេ បន្ទាប់ មកអ្នកថ្មើរជើង និងគ្រោះថ្នាក់ភាគច្រើនបានកើតឡើងនៅចន្លោះពីម៉ោង៧យប់ដល់ម៉ោង៨យប់។
គ្រោះថ្នាក់ចរាចរណ៍ជាមូលហេតុចម្បងមួយដែលបង្កឱ្យមានមនុស្សស្លាប់ របួស និងពិការ ជាពិសេសក្នុងចំណោមក្រុមវ័យក្មេង។ ពួកគេទទួលរងផលប៉ះពាល់អវិជ្ជមានលើបុគ្គល គ្រួសារ និងសហគមន៍ក៏ដូចជារាជរដ្ឋាភិបាលកម្ពុជាផងដែរ។ ប្រព័ន្ធព័ត៌ មានជនរងគ្រោះ និងគ្រោះថ្នាក់ចរាចរណ៍ផ្លូវគោកប្រចាំឆ្នាំ២០០៨បង្ហាញនូវនិន្នាការចម្បងនៃគ្រោះថ្នាក់ចរាចរណ៍នៅក្នុងប្រទេស កម្ពុជាប្រៀបធៀបទៅនឹងឆ្នាំមុនៗ។ របាយការណ៍បង្ហាញថា រយៈពេល៥ឆ្នាំចុងក្រោយនេះ ចំនួនគ្រោះថ្នាក់ចរាចរណ៍បានកើនឡើង ១៥០% និងចំនួនអ្នកស្លាប់បានកើនឡើងស្ទើរទ្វេដង។ ជាមួយគ្នានេះដែរ ចំនួនប្រជាពលរដ្ឋបានកើនឡើងចំនួន៦% និងចំនួនយានយន្ដ ដែលបានចុះបញ្ជីបានកើនឡើង១៣២%។
មនុស្សជាអ្នកបង្កគ្រោះថ្នាក់
កត្ដាមនុស្សគឺជាមូលហេតុចម្បងនាំមុខគេដែលបង្កឱ្យមានគ្រោះថ្នាក់ចរាចរណ៍ និងជនរងគ្រោះនៅតាមដងផ្លូវក្នុងប្រទេស កម្ពុជា ជាពិសេសឥរិយាបថគ្រោះថ្នាក់ជាច្រើន ដូចជាបើកបរហួសល្បឿនកំណត់ បើកបរក្នុងស្ថានភាពស្រវឹង បើកបរប្រជែងក្នុង ស្ថានភាពគ្រោះថ្នាក់ និងអត្រាពាក់មួកសុវត្ថិភាពតិច។ ទោះបីជាយ៉ាងណាក៏ដោយ គ្រោះថ្នាក់ចរាចរណ៍ និងជនរងគ្រោះថ្នាក់ចរាចរណ៍ អាចបង្ការបាន។ គួរបង្កើននូវវិធានការចាំបាច់មួយចំនួន ដូចជាការអប់រំ ការផ្សព្វផ្សាយ និងការអនុវត្ដច្បាប់ដើម្បីផ្លាស់ប្ដូរឥរិយាបថ របស់អ្នកបើកបរ ជាពិសេសការរឹតបន្ដឹងច្បាប់ចរាចរណ៍ថ្មី គឺជាគោលដ៏សំខាន់របស់រាជរដ្ឋាភិបាលកម្ពុជានៅក្នុងការតស៊ូប្រយុទ្ធប្រឆាំង នឹងកំណើននៃគ្រោះថ្នាក់ចរាចរណ៍ និងជនរងគ្រោះដោយសារគ្រោះថ្នាក់ចរាចរណ៍ និងបញ្ហាសុវត្ថិភាពចរាចរណ៍ដែលកាន់តែអាក្រក់ឡើងៗ ដូចតួលេខក្នុងរបាយការណ៍បានបង្ហាញយ៉ាងច្បាស់។
ដើម្បីសុវត្ថិភាពនៅពេលបើកបរ
ដើម្បីចៀសវាងពីគ្រោះថ្នាក់ចរាចរ និងការពារសុវត្ថិភាពខ្លួនឯង ក៏ដូចជាអ្នកដទៃដែលធ្វើចរាចរណ៍ សូមលោកអ្នកមេត្ដា បើកបរដោយគោរពច្បាប់ចរាចរណ៍ និងស្លាកសញ្ញាចរាចរណ៍នានាដែលបានកំណត់។ សូមប្រជាពលរដ្ឋក៏ដូចជាអ្នកបើកបរ អ្នកធ្វើចរាចរណ៍នៅលើដងវិថីយកចិត្ដទុកដាក់ឱ្យបានខ្ពស់ និងបើកបរដោយមានការប្រុងប្រយ័ត្ន។ ពិសេសគឺត្រូវគោរពច្បាប់ចរាចរណ៍ឱ្យបានត្រឹមត្រូវ ដើម្បីធានាបាននូវសុវត្ថិភាពក្នុងការធ្វើដំណើរ ក៏ដូចជាការចូលរួមចំណែកកាត់បន្ថយគ្រោះថ្នាក់ចរាចរដែលអាចបណ្ដាលឱ្យមានផលប៉ះពាល់ដល់អាយុជីវិត និងទ្រព្យសម្បត្ដិ ទាំងសាធារណៈទាំងឯកជន និងកត្ដាជាច្រើនទៀតក៏អាចនឹងកើតមានឡើងផងដែរ។
ប្រភព ៖ ទស្សនាវដ្តី សុខភាពយើង លេខ៤៤ ខែកញ្ញា ឆ្នាំ២០០៩
Leave a Reply