រ៉ែខ្សាច់នៅបាតទន្លេមេគង្គកម្ពុជា ជាប្រភេទខ្សាច់លេខមួយសម្រាប់ធ្វើសំណង់តូចធំ។ បច្ចុប្បន្នយើងសង្កេតឃើញថាមាន ការបូមខ្សាច់តាមដងទន្លេមេគង្គច្រើនកន្លែង។ បើទោះបីជាការបូមខ្សាច់អាចជួយដល់ការអភិវឌ្ឍប្រទេសនិងបង្កើនថវិកាជូនរដ្ឋ យ៉ាងណាក៏ដោយ។ ក៏ប៉ុន្ដែបើការបូមដែលមិនគោរពទៅតាមក្បួនខ្នាតបច្ចេកទេសត្រឹមត្រូវទេនោះ អាចធ្វើឱ្យប៉ះពាល់ដល់សង្គម និង បរិស្ថានផងដែរ។ ប្រសិនបើមិនមានវិធានការឱ្យបានទាន់ពេលវេលាអាចនឹងមានបញ្ហាប្រឈមជាច្រើននាពេលអនាគត។
ចម្លើយទាំងអស់នេះ លោកស្រី ជូ សុខផានីប្រធាននាយកដ្ឋានអង្កេតពិនិត្យការវាយតម្លៃហេតុប៉ះពាល់បរិស្ថាននៃក្រសួង បរិស្ថានបានចូលរួមបកស្រាយពីបញ្ហាទាំងនេះ តាមរយៈទស្សនាវដ្ដី សុខភាពយើង។
មូលហេតុបូមខ្សាច់តាមដងទន្លេមេគង្គ
តាមស្ថានភាពជាក់ស្ដែង នៅតាមដងទន្លេមេគង្គក្រោមមានដីគោកយ៉ាងខ្លាំងនិងដោយសារប្រទេសកម្ពុជាកំពុងមានការ អភិវឌ្ឍទៀតដែលត្រូវការវត្ថុធាតុដើមផ្សេងៗដែលនៅខ្វះច្រើន ក្នុងនោះរួមទាំងខ្សាច់សម្រាប់សាងសង់សំណង់នានា។ ខ្សាច់តាមដង ទន្លេមេគង្គជាខ្សាច់ដែលមានគុណភាពខ្ពស់ចំពោះសំណង់ធំៗ ដូចជាអគារ ផ្លូវ ស្ពានជាដើម។ ដូច្នេះហើយទើបរាជរដ្ឋាភិបាលបង្កើតឱ្យ មានការវិនិយោគលើអាជីវកម្មរ៉ែខ្សាច់នៅតាមដងទន្លេមេគង្គដែលអាចជួយរកចំណូលបានមួយចំនួនសម្រាប់យកទៅអភិវឌ្ឍប្រទេស ។ ជាពិសេសជួយសម្រួលដល់ការធ្វើដំណើរតាមផ្លូវទឹក ជួយស្ដារទន្លេសម្រួលចរន្ដទឹកហូរ និងការពារកុំឱ្យទឹកជន់លិចលំនៅដ្ឋានដី ស្រែចម្ការរបស់ប្រជាពលរដ្ឋទៀតផង។
ផលប៉ះពាល់នៃការបូមខ្សាច់
ខ្សាច់ជាសម្បត្ដិធម្មជាតិមួយប្រភេទ ដែលមានអត្ថប្រយោជន៍ចំពោះសំណង់ទូទៅ។ ទន្ទឹមនឹងអត្ថប្រយោជន៍ទាំងនោះ ការ បូមខ្សាច់ក៏អាចបង្កប៉ះពាល់ធ្ងន់ធ្ងរផងដែរចំពោះបរិស្ថានធម្មជាតិ និងសង្គមរស់នៅ។ ជាពិសេសប្រសិនបើការធ្វើអាជីវកម្ម្មរ៉ែខ្សាច់ នៅតាមដងទន្លេ មិនបានគោរពទៅតាមលក្ខណៈបទដ្ឋានបច្ចេកទេសត្រឹមត្រូវ។
1. ផលប៉ះពាល់ចំពោះបរិស្ថានធម្មជាតិ
- ការហូរច្រោះដី ៖ សកម្មភាពអាជីវកម្មអាចបង្កើតឱ្យមានការហូរច្រោះដី នៅតាមដងទន្លេមេគង្គនិងតាមកោះនានា ព្រមទាំងបង្កើតឱ្យមានកំណកដីល្បប់នៅផ្នែកខាងក្រោមនៃខ្សែទឹក។ ដោយសារកម្លាំងបូមខ្សាច់នៅបាតទន្លេដែលមានសក្ដានុពលខ្លាំង ក្លាពេកជួនរហូតឈានទៅដល់ការបាត់បង់ភាពសមាមាត្រ នៃសណ្ឋានដីនៅបាតទន្លេ។
- គុណភាពទឹក ៖ ក្នុងករណីការគ្រប់គ្រងសំណល់រឹងរាវគ្រប់ប្រភេទមិនបានត្រឹមត្រូវ នាំឱ្យការហៀរឬកំពប់ប្រេងពេល ជួសជុលម៉ាស៊ីន បានបង្កឱ្យមានភាពល្អក់ដែលកម្ទេចកករធ្លាក់ចុះ។ ហើយកម្ទេចទាំងនោះវិលវល់នាំឱ្យមានបម្រែបម្រួលសីតុណ្ហភាព ក្នុងទឹក។
- ធារាសាស្ដ្រ ៖ សកម្មភាពអាជីវកម្មខ្សាច់អាចធ្វើឱ្យរាំងស្ទះចរន្ដទឹក ការផ្លាស់ប្ដូរកម្ពស់ទឹក ទិសដៅចរន្ដទឹក និងល្បឿន ទឹកនៅក្នុងតំបន់។
- ជីវៈចម្រុះ ៖ ការបូមខ្សាច់អាចបណ្ដាលឱ្យមានការផ្លាស់ប្ដូរការចិញ្ចឹមជីវិតនិងថយចុះនៃពពួកសត្វដែលរស់នៅជុំវិញ តំបន់នោះ។ ម្យ៉ាងទៀតដោយសារសកម្មភាពការបូមខ្សាច់បង្កឱ្យមានសម្លេងម៉ាស៊ីនខ្លាំងៗ ពេលកំពុងធ្វើអាជីវកម្មនិងសកម្មភាព ផ្សេងៗរបស់កម្មករ។ ក្រៅពីនោះក៏មានការប៉ះពាល់ដល់ត្រីគ្រប់ប្រភេទ ពពួករុក្ខជាតិក្នុងទឹកប្រព័ន្ធអេកូឡូស៊ីក្នុងទឹកកើនឡើងនូវ ភាពល្អក់ កម្ទេចកករធ្លាក់ចុះ ហើយវិលវល់ និងមានបម្រែបម្រួលសីតុណ្ហភាពក្នុងទឹកដែលបង្ខំឱ្យពួកសត្វទាំងនោះធ្វើការបម្លាស់ទី ទៅកន្លែងផ្សេង។
រូបភាពទស្សនាវដ្ដីសុខភាពយើង
2. ផលប៉ះពាល់ចំពោះសង្គមរស់នៅ
- ការរើលំនៅដ្ឋាន ៖ សហគមមានការភ័យខ្លាចពីការបាក់ច្រាំងដែលអាចបណ្ដាលឱ្យបាត់បង់ដីកសិកម្មការតាំងទីលំនៅ និងបាត់បង់ដីដាំដុះ ដែលផ្ដល់ផលប្រយោជន៍ដល់សហគម។ នៅដំណាក់កាលនេះការធ្វើអាជីវកម្មបូមខ្សាច់អាចបាត់បង់មុខរបររបស់ សហគមមួយចំនួនតាមដងទន្លេមេគង្គ ដោយសារការបំពុលទឹក ការបាក់ច្រាំងនៅសងខាងដងទន្លេនិងនៅតាមកោះដែលពាក់ព័ន្ធ មានលក្ខណៈទ្រង់ទ្រាយធំ។
- ការប្រើប្រាស់ដី និងទឹក ៖ ប៉ះពាល់ដល់ការប្រើប្រាស់ដីស្រែចម្ការ ដីលំនៅដ្ឋានសំណង់ផ្សេងៗនៅតាមច្រាំងទន្លេ និង កោះនានាដែលពាក់ព័ន្ធ ដោយសារការហូរច្រោះដី និងបាក់ច្រាំងដែលបង្កឡើងដោយសកម្មភាពបូមខ្សាច់។ ក្រៅពីសកម្មភាពបូម ខ្សាច់អាចបណ្ដាលឱ្យប៉ះពាល់ដល់ការប្រើប្រាស់ទឹករបស់ប្រជាពលរដ្ឋក្នុងតំបន់ដោយអាចកើតឡើងនូវជម្ងឺឆ្លងផ្សេងៗ តាមរយៈនៃ ការកើនឡើងនៃពពួកសារធាតុរឹងអណ្ដែតក្នុងទឹក ដែលវិលវល់ក្នុងទឹកនិងកម្រិតរលាយអុកស៊ីសែនជាដើម។ ការប៉ះពាល់ដល់គុណ ភាពទឹកជាបញ្ហាចម្បងមួយរវាងសហគម និងម្ចាស់អាជីវកម្មខ្សាច់។
- វប្បធម៌ និងសាសនា ៖ ម្ចាស់គម្រោងភាគច្រើនបានប្រើប្រាស់កម្លាំងពលកម្មមកពីតំបន់ផ្សេងៗនិងក្រៅប្រទេសដែល ប្រកាន់ទំនៀមទម្លាប់ប្រពៃណីខុសគ្នា។ ទង្វើទាំងនេះបណ្ដាលឱ្យប៉ះពាល់ដល់វប្បធម៌និងសាសនារបស់សហគមក្នុងតំបន់គម្រោង។
- ផ្លូវគមនាគមន៍ ៖ ករណីការធ្វើអាជីវកម្មមានទ្រង់ទ្រាយធំអាចប៉ះពាល់ដល់ការប្រើប្រាស់ផ្លូវទឹករបស់សាធារណៈជន ដូចជាការធ្វើដំណើរឆ្លងកាត់ទន្លេ ឬការធ្វើចរាចរដឹកផលិតផលចេញចូល។ ជាហេតុបណ្ដាលឱ្យមានការរាំងស្ទះឬអាចលិចលង់មកពី មានរលកធំៗ ដែលបង្កដោយសកម្មភាពនាវារបស់អាជីវកម្មបូមខ្សាច់ចេញចូល។
- សុខភាពសាធារណៈ ៖ សកម្មភាពអាជីវកម្មខ្សាច់អាចបណ្ដាលឱ្យប៉ះពាល់ធ្ងន់ធ្ងរដល់សុខភាពសាធារណៈនិងកម្មករ ដូចជាអាចកើតមានជាជម្ងឺឆ្លង ផ្លូវដង្ហើម ជម្ងឺសើស្បែក ជម្ងឺពោះវៀន និងជម្ងឺផ្សេងៗទៀតដែលបណ្ដាលមកពី ៖
- ទឹកកខ្វក់ និងការគ្រប់គ្រង់សំណល់មិនបានត្រឹមត្រូវ
- ទឹកត្រូវរងការបំពុល ដោយការកំពប់ ឬហៀរប្រេងម៉ាស៊ីនពីគ្រឿងចក្រ
- អាចបណ្ដាលឱ្យមានគ្រោះថ្នាក់ដែលបណ្ដាលមកពីឧបករណ៍ និងសម្ភារៈគម្រោង
- ការបឺត ឬស្រូបចូលនូវភាគល្អិតនៃធូលីរបស់ប្រព័ន្ធផ្លូវដង្ហើម។
វិធីទប់ស្កាត់ និងដំណោះស្រាយរបស់ក្រសួងបរិស្ថាន
ក្រសួងបរិស្ថានតម្រូវឱ្យគម្រោងធ្វើអាជីវកម្មរ៉ែគ្រប់ប្រភេទរួមទាំងអាជីវកម្មរ៉ែខ្សាច់ ត្រូវរៀបចំរបាយការណ៍ហេតុប៉ះពាល់បរិស្ថាន និងសង្គមដើម្បីធានាការអភិវឌ្ឍន៍ឱ្យមាននិរន្ដរភាពបរិស្ថាន។ របាយការណ៍ទាំងនេះជាវិធានការនិងដំណោះស្រាយមួយ ដែលមានប្រសិទ្ធភាព អាចកាត់បន្ថយការប៉ះពាល់បរិស្ថានអវិជ្ជមានឱ្យដល់កម្រិតអប្បបរមានិងបង្កើតការប៉ះពាល់បរិស្ថានវិជ្ជមានឱ្យ ដល់កម្រិតអតិបរមា។ ម្យ៉ាងទៀតត្រូវសិក្សាពីស្ថានភាពនៃទន្លេ និងទីតាំងខ្សាច់ឱ្យបានច្បាស់លាស់ជាពិសេសសិក្សាពីរបត់ទន្លេ ទាំង ទទឹង និងបណ្ដោយនៃគម្រោងមុននឹងស្នើសុំវិនិយោគ។ កត្ដាសំខាន់អនុវត្ដឱ្យបានត្រឹមត្រូវនិងតាមលក្ខណៈបច្ចេកទេសដែលផ្នែកពាក់ ព័ន្ធផ្ដល់យោបល់។
ដំបូន្មានអ្នកប្រឹក្សា
ម្ចាស់អាជីវម្មតូចធំគួរគោរពតាមបច្ចេកទេស នៃការធ្វើអាជីវកម្មឱ្យបានប្រសើរដោយត្រូវធ្វើរបាយការណ៍វាយតម្លៃហេតុ ប៉ះពាល់បរិស្ថាន និងសង្គម ដើម្បីធានាការអភិវឌ្ឍន៍ឱ្យមាននិរន្ដរភាពបរិស្ថាន។ ជាពិសេសធ្វើឱ្យប្រជាពលរដ្ឋដែលមិនទាន់មានការ ងារ អាចមានការងារធ្វើរយៈពេលយូរ ហើយថែមទាំងជួយសម្រួលដល់បន្ទុកគ្រួសារ។
ប្រភព ៖ ទស្សនាវដ្តី សុខភាពយើង លេខ០២២ ខែវិច្ឆិកា ឆ្នាំ២០០៧
Leave a Reply