ស្ដ្រីគ្រប់រូបគួរតែមានការសប្បាយរីករាយនៅពេលដែលបានសម្រាលបុត្រហើយ។ ផ្ទុយមកវិញ ស្ដ្រីមួយចំនួនបែរ ជាមានបញ្ហាផ្លូវចិត្ដទៅវិញ ក្រោយពេលសម្រាលកូនរួច។ ដោយសារតែស្ដ្រីទាំងនោះភាគច្រើនទទួលបន្ទុកគ្រួសារច្រើនមុខ ដែលជាហេតុធ្វើឱ្យស្ដ្រីគិតច្រើន ខ្វល់ខ្វាយ ជាហេតុបង្កឱ្យមានអារម្មណ៍វិលវល់ មានចិត្ដមិនស្ងប់ ហើយបណ្ដាលឱ្យទៅជាទាស់ និង មានបញ្ហាផ្លូវចិត្ដ។
ទស្សនាវដ្ដី សុខភាពយើង បានធ្វើកិច្ចសម្ភាសន៍ជាមួយលោកស្រីវេជ្ជបណ្ឌិត ចក ធីតា ឯកទេសវិកលវិទ្យា និងជា អនុប្រធានកម្មវិធីជាតិសម្រាប់សុខភាពផ្លូវចិត្ដនៃក្រសួងសុខាភិបាលធ្វើការបកស្រាយជូនប្រិយមិត្ដ អំពីបញ្ហាផ្លូវចិត្ដដែលកើតមាន ក្រោយពេលសម្រាលកូនរបស់ស្ដ្រីជាម្ដ្កាយ។
ហេតុអ្វីបានជាសុខភាពផ្លូវចិត្ដមាតាសំខាន់?
ជាធម្មតារវាងម្ដាយ និងកូនគឺមានសម្ព័ន្ធនឹងគ្នា។ ហេតុនេះប្រសិនបើម្ដាយមានបញ្ហាសុខភាពផ្លូវចិត្ដ នោះនាំឱ្យទារក ដែលនៅក្នុងផ្ទៃក៏មានសុខភាពមិនល្អដែរ។ ម្ដាយមានអារម្មណ៍បែបណា កូនដែលនៅក្នុងផ្ទៃក៏មានអារម្មណ៍បែបនោះដែរ ព្រោះ អារម្មណ៍របស់ម្ដាយ គឺជាអារម្មណ៍របស់កូន។ បើម្ដាយមានភាពទុកសោកសង្រេង ស្មុគស្មាញ គិតច្រើន ទាំងនេះគឺជាការប៉ះទង្គិច ទៅដល់កូននៅក្នុងផ្ទៃផងដែរ។ ដូចនេះសុខភាពផ្លូវកាយ និងសុខភាពផ្លូវចិត្ដរបស់ម្ដាយសំខាន់ណាស់ ដែលអ្នកជាទីស្រឡាញ់ ជាស្វាមី និងក្រុមគ្រួសារយកចិត្ដទុកដាក់ថែទាំ។
លក្ខណៈទូទៅរបស់ស្ដ្រីក្រោយពេលសម្រាលកូន
ស្ដ្រីទូទៅតែងតែមានអារម្មណ៍មិនខុសគ្នាប៉ុន្មានទេ ក្រោយពេលសម្រាលបុត្រហើយ។ លក្ខណៈអារម្មណ៍ទាំងនោះ បានបង្ហាញឱ្យដឹងជាអាការដូចតទៅ ៖
1. លក្ខណៈទី១ ៖ ក្រោយពេលសម្រាលបុត្របាន១សប្ដាហ៍ ស្ដ្រីមានភាពស្រងូតស្រងាត់ មានអារម្មណ៍ចង់យំ។ នេះជា រឿងធម្មតារបស់ស្ដ្រីទូទៅដែលកើតមានអារម្មណ៍បែបនេះ ក្នុងរយៈពេល២ឬ៣ថ្ងៃតែប៉ុណ្ណោះ ហើយលក្ខណៈនេះមិនបង្កឱ្យមាន គ្រោះថ្នាក់អ្វីឡើយ។
2. លក្ខណៈទី២ ៖ ក្រោយពេលទារកកើតបាន១ខែ ម្ដាយមានអារម្មណ៍សោះអង្គើយចង់តែយំ មានបញ្ហាទទួលទាន អាហារមិនសូវបាន ដេកមិនសូវលក់ ឬអស់កម្លាំងល្ហិតល្ហៃជាដើម។ នៅពេលនេះ ម្ដាយពុំបានយកចិត្ដទុកដាក់ថែទាំទារកទេ ពីព្រោះ ខ្លួនឯងមានបញ្ហាធ្លាក់ទឹកចិត្ដ។
3. លក្ខណៈទី៣ ៖ ភាគតិចណាស់ដែលស្ដ្រីមានការវង្វេងវង្វាន់ មានអារម្មណ៍តប់ប្រមល់ និយាយមិនដឹងខុសត្រូវ គ្មានអនាម័យ ស្លៀកពាក់មិនដឹងស្លៀកពាក់ ព្រោះមានការធ្លាក់ទឹកចិត្ដធ្ងន់ធ្ងរ។ លក្ខណៈនេះជាបញ្ហាផ្លូវចិត្ដធ្ងន់ធ្ងរបង្កឱ្យមានគ្រោះថ្នាក់។
មូលហេតុស្ដ្រីមានបញ្ហាផ្លូវចិត្ដក្រោយពេលសម្រាលកូន
ម្ដាយមានកិច្ចការត្រូវមើលថែទាំកូន ពិតជាធ្វើឱ្យហត់នឿយច្រើន ទាំងកម្លាំងចិត្ដ និងកម្លាំងកាយ។ ដូចនេះម្ដាយតែងតែ គិតច្រើនពីរឿងនេះពីរឿងនោះមិនឈប់ឈរ។ ឧទាហរណ៍ ស្ដ្រីម្នាក់មិនដែលមានកូនទេ នៅពេលដែលមានកូនជាលើកទី១ ស្ដ្រីម្នាក់ នោះចាប់ផ្ដើមគិតច្រើន ថាត្រូវចិញ្ចឹមកូនយ៉ាងម៉េច តើខ្លួនឯងត្រូវទៅធ្វើការបានដែរឬទេ បើសិនអាចទៅធ្វើការបាន តើមានពេល រៀបចំបាយទឹកឱ្យប្ដីឬអត់ តើមានអ្នកណាជួយមើលកូន។ ការគិតនេះ គឺស្ដ្រីចាប់ផ្ដើមគិតតាំងពីមានផ្ទៃពោះមកម្ល៉េះ។ មិនថាតែស្ដ្រី ទើបតែមានកូនជាលើកដំបូងទេ ស្ដ្រីដែលធ្លាប់មានកូនច្រើនហើយក៏គិតដូច្នេះដែរ ព្រោះត្រូវបន្ថែមបន្ទុកមួយទៀត ហើយចំណាយ ក៏កាន់តែច្រើនជាងមុន។ បន្ទាប់ពីសម្រាលកូនបាន២ឬ៣ខែ ស្ដ្រីមានការព្រួយខ្លាចតែមានផ្ទៃពោះទៀត ជាហេតុធ្វើឱ្យស្ដ្រីមាន អារម្មណ៍ខ្វល់ខ្វាយ គិតច្រើន។ ម្យ៉ាងទៀត ចំណែកឯស្ដ្រីដែលមានប្ដីចូលចិត្ដទៅមានស្រីនៅខាងក្រៅ ក៏ជាបញ្ហាដែលធ្វើឱ្យស្ដ្រីដេក មិនលក់ ព្រួយបារម្ភនៅពេលដែលខ្លួនឯងសម្រាលកូន ព្រោះខ្លាចតែប្ដីមិនយកចិត្ដទុកដាក់ថែទាំខ្លួន។ ការគិតទាំងនេះកើតមានជាប្រចាំ បណ្ដាលឱ្យស្ដ្រីឈានទៅមានបញ្ហាផ្លូវចិត្ដក្រោយពេលសម្រាលកូន។
រោគសញ្ញាបញ្ហាផ្លូវចិត្ដក្រោយពេលសម្រាលកូន
ក្រោយពេលសម្រាលកូនបាន២សប្ដាហ៍ បញ្ហាផ្លូវចិត្ដរបស់មាតាបានបង្ហាញអាការយ៉ាងច្បាស់ ដូចជាមានអាកប្បកិរិយា ប្លែកៗ ខុសពីធម្មតា ចេះតែភ្លឹក មានភាពស្រងូតស្រងាត់ អារម្មណ៍រវើរវាយដូចជាមិននៅក្នុងខ្លួន វង្វេងវង្វាន់ ភ្លេចច្រើន និយាយស្ដី មិនដឹងខុសត្រូវ ចង់តែស្រែកយំ ដើរមិនដឹងដើរជាដើម។ ជួនកាលបើមានបញ្ហាផ្លូវចិត្ដធ្ងន់ធ្ងរ អាចស្រែក និយាយតែម្នាក់ឯង ដោយចេះតែឮសម្លេងគេមកហៅ ដែលជារោគសញ្ញាវិកលចរិត។
វិធីព្យាបាលបញ្ហាផ្លូវចិត្ដក្រោយពេលសម្រាលកូន
បញ្ហាផ្លូវចិត្ដនេះ បើកើតឡើងនៅដំណាក់កាលដំបូង ហើយស្ថិតនៅកម្រិតស្រាល គ្រូពេទ្យឯកទេសអាចធ្វើការព្យាបាល តាមបែបប្រឹក្សាយោបល់ ប្រយោជន៍ជួយគាត់ឱ្យស្វែងយល់ពីបញ្ហា និងរកវិធីដោះស្រាយបញ្ហាដោយខ្លួនឯង។ ការធ្វើបែបនេះ ជាមធ្យោបាយជួយឱ្យឆាប់ជាសះស្បើយ និងត្រឡប់ទៅរកភាពប្រក្រតីវិញ។ ប្រសិនបើផ្លូវចិត្ដនេះទុកយូរមិនឆាប់ប្រញាប់មក កាន់មន្ទីរពេទ្យ ដើម្បីធ្វើការព្យាបាលទេ ផ្លូវចិត្ដនេះកាន់តែមានបញ្ហាធ្ងន់ធ្ងរ ដូចជាចង់សម្លាប់ខ្លួនជាដើម។
វិធីបង្ការបញ្ហាផ្លូវចិត្ដក្រោយពេលសម្រាលកូន
មុនពេលចាប់ផ្ដើមមានកូន ស្ដ្រីដែលទើបតែមានកូនជាលើកដំបូងត្រូវស្វែងយល់ថា បើខ្លួនឯងមានកូន តើត្រូវថែទាំកូនបែបណា ហើយអាចទៅធ្វើការបានដែរឬទេជាដើម។ នេះជាវិធីមួយដែលជួយស្ដ្រីជាអ្នកដែលទើបតែសម្រាលបុត្រអាចទទួលបាននូវការ យល់ពីបញ្ហា និងមានអារម្មណ៍នឹងនរជាងមុនបាន។ ម្យ៉ាងទៀតបន្ទាប់ពីសម្រាលកូន ក្រុមគ្រួសារ ប្ដី ឬអ្នកដែលជិតដិតអាចជួយ ផ្នែកផ្លូវកាយ និងគាំទ្រផ្លូវចិត្ដ និងមិនត្រូវបណ្ដោយឱ្យគាត់នៅឯកោទេ។
ដំបូន្មានអ្នកឯកទេស
សុខភាពរាងកាយ និងសុខភាពផ្លូវចិត្ដរបស់ស្ដ្រីជាមាតាសំខាន់ណាស់ ដែលស្វាមី និងបងប្អូនញាតិមិត្ដគួរយកចិត្ដទុកដាក់។ បុរសជាប្ដីមិនត្រូវធ្វើបាបផ្លូវចិត្ដភរិយាឱ្យគ្រាំគ្រាឡើយ។ បន្ទាប់ពីត្រឡប់មកពីធ្វើការវិញ កិច្ចការអ្វីដែលមាននៅក្នុងផ្ទះ អាចធ្វើបាន ប្ដីគួរតែចែករំលែកសម្រាលការងារភរិយាឱ្យបានច្រើនបំផុត។
ប្រភព ៖ ទស្សនាវដ្តី សុខភាពយើង លេខ៤០ ខែឧសភា ឆ្នាំ២០០៩
Leave a Reply