ជាការពិតណាស់ក្រចកគឺជាផ្នែកមួយនៃសម្រស់របស់ម្រាមដៃ។ ស្ដ្រីគ្រប់រូបគួរតែយល់ថាការរចនាម៉ូតក្រចកអាចជួយឱ្យ ក្រចករួមទាំងម្រាមដៃស្រស់ស្អាតបាន។ ការរចនាម៉ូតក្រចកមិនមែនជារឿងមួយដែលលំបាកនោះទេ ហើយក៏មិនធ្វើឱ្យមានបញ្ហា ចំពោះក្រចកនោះដែរ បើសិនជាលោកអ្នកអនុវត្ដទៅតាមការណែនាំរបស់អ្នកជំនាញនោះ។
ម៉ូតក្រចកពេញនិយម
ម៉ូតក្រចកសម្រាប់រចនាមានច្រើនម៉ូតណាស់ទៅតាមការច្នៃប្រឌិត នៅពេលនេះទស្សនាវដ្ដី សុខភាពយើង ចាប់ផ្ដើមលើក យកមកបង្ហាញជូនដូចតទៅ។
1. ម៉ូតក្រចកផ្កាផុសស្លឹកប្រាំ ៖ ចំពោះម៉ូតក្រចកផ្កាផុសស្លឹកប្រាំនេះ បើធ្វើនៅលើក្រចកផ្ទាល់មិនសូវជាស្រស់ស្អាត ហើយទុកមិនបានយូរដូចជាការរចនានៅលើក្រចកជ័រហើយយកមកបិទនៅលើក្រចកនោះទេ។ មុននឹងចាបផ្ដើមរចនាម៉ូតក្រចកផ្កា ផុសនេះជាដំបូងមិត្ដនារីទាំងអស់គួរតែសម្អាតក្រចក និងកាត់សាច់ក្រចកឱ្យបានស្អាតជាមុនសិន។ បន្ទាប់មកត្រូវលាបពណ៌ទៅតាមចំណង់ចំណូលចិត្ដ និងតម្រូវការរបស់លោកស្រីអ្នកនាងកញ្ញា ប៉ុន្ដែគួរតែប្រើពណ៌ខ្ចីៗទើបស្រស់ស្អាត បើសិនជាចង់បានក្រចកដែលស្រស់ស្អាតជាងនេះសុភាពនារីអាចដាក់បារតរោយពីលើក៏បាន។ បន្ទាប់មកត្រូវរចនាផ្កាលើក្រចកដែលលាប ដោយប្រើម្សៅចាក់ផ្កាផុស។ សម្រាប់ផ្កាផុសនេះអាចប្រើបានគ្រប់ពណ៌ ប៉ុន្ដែជាពណ៌ខ្ចីៗ ដូចជាពណ៌ទឹកក្រូចខ្ចី ឬពណ៌ផ្ទៃមេឃលាយសជាពណ៌ពេញនិយម។ បន្ទាប់មកទើបរចនាស្លឹកដោយម្សៅចាក់ផ្កាផុសដដែលពណ៌បៃតង។ ចំពោះម៉ូតក្រចកនេះអាចចូលរួមបានគ្រប់កម្មវិធីទាំងអស់ ជាពិសេសពិធីមង្គលការ ហើយម៉ូតក្រចកនេះអាចប្រើបានចំពោះតែយុវវ័យប៉ុណ្ណោះ។
2. ម៉ូតក្រចកទឹកផ្លែស្ដ័រប៊ឺរី ៖ សម្រាប់ម៉ូតក្រចកទឹកផ្លែស្ដ័រប៊ឺរីមុននឹងចាប់ផ្ដើមរចនា មិត្ដនារីគ្រប់រូបត្រូវសម្អាត និងកាត់ សាច់ក្រចកឱ្យបានស្អាតជាមុនសិន ដើម្បីឱ្យការរចនានេះមើលទៅមានភាពស្រស់ស្អាត។ ចំពោះម៉ូតក្រចកប្រភេទនេះបើសិនជាអ្នកនាងកញ្ញាមានក្រចកដៃវែងស្រាប់ វាជាការប្រសើរបំផុត ព្រោះក្រចកដៃវែងអាចរចនាបានស្អាតជាងក្រចកខ្លី។ ជាដំបូងត្រូវលាបថ្នាំក្រចកទៅតាមពណ៌ដែលស្រឡាញ់ ហើយទុកឱ្យស្ងួតបន្ដិច បន្ទាប់មកត្រូវគូសផ្លែស្ដ័រប៊ឺរី ដោយប្រើពណ៌ក្រហម ហើយត្រូវគូសទងស្លឹកស្ដ័រប៊ឺរីលក្ខណៈជាវល្លិ។ ចំណែកឯផ្កាទឹកវិញត្រូវប្រើថ្នាំគូសក្រចក (ទឹកថ្នាំសម្រាប់គូសក្រចក) ទៅតាមពណ៌ដែលចូលចិត្ដ ហើយស៊ីគ្នាជាមួយនឹងថ្នាំលាបក្រចក តែបើសិនជាក្រចកខ្លីវិញមិនបាច់គូសផ្កានោះទេ គ្រាន់តែគូសផ្លែស្ដ័រប៊ឺរី និងទងឬក៏គូសជាវល្លិជាការស្រេច។ ចំពោះម៉ូតក្រចកប្រភេទនេះអាចចូលរួមបានគ្រប់កម្មវិធី អាចប្រើបានចំពោះយុវវ័យ និងស្ដ្រីវ័យកណ្ដាល។
3. ម៉ូតក្រចកកាំជណ្ដើរ ៖ ចំណែកឯម៉ូតក្រចកប្រភេទនេះមុនចាប់ផ្ដើមរចនាម៉ូតត្រូវតែសម្អាត និងកាត់សាច់ក្រចកឱ្យ បានស្អាតជាមុនសិន ដើម្បីឱ្យការរចនានេះមើលទៅមានភាពស្រស់ស្អាត។ ជាដំបូងត្រូវលាបពណ៌ដែលចូលចិត្ដ ភាគច្រើនយុវវ័យ ចូលចិត្ដប្រើពណ៌ខ្មៅសម្រាប់គូស និងពណ៌សសម្រាប់លាប ព្រោះមើលទៅមានភាពស្រស់ស្អាតសក្ដិសមទាំងស្បែកស និងស្បែកខ្មៅ។ បន្ទាប់ពីលាបក្រចកហើយ ត្រូវទុកឱ្យស្ងួតទើបគូសក្រឡាបញ្ឆិតៗដូចជាកាំជណ្ដើរ និងត្រូវយកទឹកថ្នាំពណ៌ខ្មៅមកបន្ដក់ពីលើក្រឡាឱ្យដូចជាកាំជណ្ដើរ ទុកឱ្យស្ងួត បន្ទាប់មកត្រូវលាបទឹករលោងជាការស្រេច។ ចំពោះម៉ូតក្រចកប្រភេទនេះអាចរចនាបានចូលរួមគ្រប់កម្មវិធី។
(សូមអានបន្ដនៅលេខក្រោយ)
ប្រភព ៖ ទស្សនាវដ្តី សុខភាពយើង លេខ៤៩ ខែកម្ភៈ ឆ្នាំ២០១០
Leave a Reply