មាតាមួយចំនួនដែលជាអ្នកថែរក្សាកុមារឬទារក តែងតែជួបប្រទះនូវជម្ងឺកើតមានលើស្បែកទារកជានិច្ច ជាពិសេសនោះ បញ្ហាស្បែកឡើងក្រហម ឬកន្ទួលរមាស់ផងដែរ។ ប៉ុន្ដែឪពុកម្ដាយជាទូទៅតែងតែគិតថា ជាបញ្ហាធម្មតាតែប៉ុណ្ណោះ ព្រោះបញ្ហា ស្បែកឡើងកន្ទួលក្រហមនេះតែងកើតមានជាញឹកញាប់ទៅលើកុមារ។ ដោយឡែកសម្រាប់ផ្នែកវេជ្ជសាស្ដ្រវិញបញ្ហាមានឡើង ក្រហមកន្ទួលលើស្បែកនេះ អាចមានបញ្ហាប្រឈមមុខនឹងជម្ងឺជាច្រើន រហូតអាចមានគ្រោះថ្នាក់ដល់អាយុជីវិតផងដែរ។
![ជម្ងឺរលាកក្រហមកន្ទួលលើស្បែកកុមារ](http://www.healthcambodia.com/wp-content/uploads/2012/01/5-copy2-199x300.jpg)
ទស្សនាវដ្ដី សុខភាពយើង បានជួបសម្ភាសផ្ទាល់ជាមួយលោកវេជ្ជបណ្ឌិត ហុង សុខឃាង ឯកទេសជម្ងឺកុមារនៃមន្ទីរពេទ្យ កុមារជាតិ ធ្វើការបកស្រាយអំពីបញ្ហានេះដូចខាងក្រោម។
បញ្ហាឡើងក្រហមកន្ទួលលើស្បែកកុមារជាអ្វី?
បញ្ហាឡើងក្រហមកន្ទួលលើស្បែកកុមារ គឺជាប្រតិកម្មមួយរបស់ស្បែក។ វាមានកត្ដាច្រើនយ៉ាងដែលបានជំរុញឱ្យមានបញ្ហា នេះ ដូចជាប្រតិកម្មជាមួយថ្នាំពេទ្យ ជម្ងឺឆ្លង ឬប្រតិកម្មអាលែកហ្ស៊ីជាមួយសារធាតុផ្សេងៗ។
មូលហេតុបណ្ដាលឱ្យមានក្រហមកន្ទួលលើស្បែកកុមារ
ការឡើងក្រហមកន្ទួលលើស្បែកកុមារភាគច្រើនបណ្ដាលមកពីវីរុស។ តែប្រសិនបើវាបង្កឡើងដោយសារវីរុសនោះ វាមិន ធ្វើឱ្យគ្រោះថ្នាក់ដល់ក្មេងឡើយ ហើយបាត់ទៅវិញទៅតាមពេលវេលាដោយពុំចាំបាច់ព្យាបាលឡើយ។ ក៏ប៉ុន្ដែមូលហេតុដែលកើតមាន លើស្បែកក្មេងខ្លះ អាចជាជម្ងឺធ្ងន់ធ្ងរ ឬអាចគំរាមកំហែងដល់អាយុជីវិតផងដែរ។ ក្នុងនាមជាមាតាបិតា ឬអាណាព្យាបាល លោកអ្នកគួរស្គាល់ និងយល់ដឹងអំពីឡើងក្រហមទាំងនេះ។ ខាងក្រោមនេះជាមូលហេតុមួយចំនួនដែលទាក់ទងទៅនឹងជម្ងឺឆ្លង។
១ - ជម្ងឺឆ្លងមិនសូវធ្ងន់ធ្ងរ
- អុតស្វាយ : រោគសញ្ញាលេចឡើងរយៈពេល១០-២០ថ្ងៃ ក្រោយប៉ះពាល់មេរោគ។ ជម្ងឺនេះមានវ៉ាក់សាំងការពារ។
- កញ្ជ្រឹល : មានវ៉ាក់សាំងការពារ
- ស្អូច : មានវ៉ាក់សាំងការពារ
- អុតក្ដាម : មានលើបំពង់ក លើកលែងបាតដៃបាតជើង
- ជម្ងឺទី៥ : ថ្ពាល់ក្រហម
២ - ការឡើងក្រហមស្បែកដែលគំរាមកំហែងអាយុជីវិត
- មើលទៅកុមារមានអាការធ្ងន់ធ្ងរ កុមារមិនលេងសើច មិនទទួលទានអាហារផ្សេងៗ មិនដេក ដេកសន្លឹម ប្រកាច់ឬ សន្លប់ មិននោម។ ប្រសិនបើមាតាបិតាឃើញកូនរបស់ខ្លួនមានអាការបែបនេះ ត្រូវរួសរាន់ប្រញាប់ទៅកាន់មន្ទីរពេទ្យជាបន្ទាន់ ដើម្បី ឱ្យគ្រូពេទ្យជំនាញធ្វើការវិនិច្ឆ័យទៅលើរោគសញ្ញាដែលបានស្ដែងឡើងនៅលើស្បែក។
- ម្យ៉ាងទៀតប្រសិនបើកូនចៅលោកអ្នកមានអាការក្ដៅ និងមានលេចគ្រាប់ឈាមនៅលើស្បែក“ចំណុចតូចៗមិនបាត់នៅ ពេលសង្កត់” បញ្ហានេះកុមារអាចបណ្ដាលឱ្យមានគ្រោះជាមិនខានឡើយ។
៣ – ការឡើងក្រហមស្បែកដោយសារផ្សិត និងប៉ារ៉ាស៊ីត
- ជម្ងឺកមរមាស់“មេក្របី”
- ស្រែង
– ជម្ងឺផ្សិតក្រហមជើងឬរមាស់
៤ - ការឡើងក្រហមស្បែកទៅលើទារកអាយុក្រោម១ខែ
- ជម្ងឺខ្លះអាចបង្កឱ្យមានចំណុចតូចៗពណ៌ស ឬលឿងនៅលើមុខ ជាពិសេសច្រមុះ។
- ព្យាបាលជាសះស្បើយយ៉ាងងាយស្រួលដោយគ្រូពេទ្យ
- ជម្ងឺមុនលើទារកជាដោយខ្លួនឯង
- ការឡើងក្រហមដោយមេរោគផ្សិតត្រង់តំបន់ស្លៀកខោទឹកនោម អាចព្យាបាលជា។
– ការឡើងក្រហមដោយសារខោទឹកនោម។
ដំបូន្មានអ្នកជំនាញ
មាតាបិតាឬអាណាព្យាបាលគ្រប់រូបគួរយកចិត្ដទុកដាក់ថែរក្សាកូនចៅឱ្យបានល្អ។ ជាពិសេសបញ្ហារលាកស្បែកឡើង ក្រហមកន្ទួល។ ប្រសិនបើទារកឬកុមារជួបបញ្ហានេះ ត្រូវតែរួសរាន់ប្រញាប់ទៅកាន់មន្ទីរពេទ្យ ដើម្បីធ្វើការព្យាបាលទៅលើរោគ សញ្ញាដែលបានស្ដែងឡើង។ ព្រោះបញ្ហាចេញនៅលើស្បែកនេះអាចបណ្ដាលមកពីវីរុសឬជម្ងឺផ្សេងៗ ដែលលោកអ្នកមិនអាចដឹងបាន មានតែគ្រូពេទ្យជំនាញប៉ុណ្ណោះទើបដឹងថា ក្មេងនេះមានជម្ងឺអ្វីឱ្យពិតប្រាកដ។
ប្រភព ៖ ទស្សនាវដ្តី សុខភាពយើង លេខ០៦០ ខែមករា ឆ្នាំ២០១១
Leave a Reply