ជម្ងឺឆែបមាត់និងឆែបក្រអូមមាត់ច្រើនតែកើតមានលើកុមារពីកំណើត ដែលមានអត្រាកុមារម្នាក់ក្នុងចំណោមកុមារ៧៥០នាក់នៅប្រទេសអភិវឌ្ឍន៍ ហើយអត្រានេះបានកើនឡើងដល់ម្នាក់ក្នុងចំណោមកុមារ៥០០នាក់ក្នុងទ្វីបអាស៊ី។ ជម្ងឺនេះមិនត្រឺម តែប៉ះពាល់ដល់សម្ផស្សប៉ុណ្ណោះទេ តែអាចធ្វើឱ្យកុមារនិយាយមិនបានច្បាស់ល្អ និងខ្មាសអៀនដែលអាចធ្វើឱ្យអត្ដចរិតរបស់គេប្រែ ប្រួលបាន។ បច្ចុប្បន្ននេះកុមារដែលមានជម្ងឺឆែបមាត់ និងឆែបក្រអូមមាត់អាចបានទទួលការវះកាត់ដោយឥតបង់ប្រាក់។
ទស្សនាវដ្ដី សុខភាពយើង បានជួបសម្ភាសន៍ជាមួយលោកវេជ្ជបណ្ឌិត ម៉ុក ធាវី នាយកកម្មវិធីវះកាត់របស់អង្គការអ៊ុបពើរ៉េហ្សុនស្មាយ ដែលមានទីស្នាក់ការនៅមន្ទីរពេទ្យមិត្ដភាពខ្មែរសូវៀតស្ដីពីវិធីវះកាត់ព្យាបាលមាត់ឆែបជូនលោកអ្នកបានទទួល ជ្រាប។
មាត់ឆែបជាអ្វី?
ជម្ងឺមាត់ឆែបកើតមានចំពោះគភ៌នៅដំណាក់កាលលូតលាស់ក្នុងផ្ទៃម្ដាយនាសបា្ដហ៍ទី៦-៧។ កុមារអាចឆែបបបូរមាត់ម្ខាង ឬសងខាង តិចឬច្រើនទៅតាមកម្រិត។ ក្នុងនោះអត្រាឆែបបបូរមាត់កើតមានលើក្មេងប្រុសច្រើនជាងក្មេងស្រី។ ផ្ទុយទៅវិញក្មេងស្រី មានករណីឆែបក្រអូមមាត់ច្រើនជាងក្មេងប្រុស។ កុមារដែលឆែបមាត់អាចមានផលប៉ះពាល់ទៅលើការបៅដោះ ការនិយាយ ធ្មេញ ច្រើនដុះមិនត្រង់ល្អ មានអត្ដចរិតខ្មាសអៀនច្រើន មិនចង់និយាយស្ដីនិងបាត់បង់នូវភាពក្លាហាន។
មូលហេតុមាត់ឆែប
តាមរយៈការស្រាវជ្រាវបានបង្ហាញថា មូលហេតុដែលបង្កជម្ងឺមាត់ឆែបមានប្រមាណពី៣៣%ទៅ៣៦%ហើយច្រើនបណ្ដាលមកពីកត្ដាតំណពូជ តាមរយៈហ្សែនឬសែនរបស់ឪពុកម្ដាយនិងប្រមាណ៦៤%ទៅ៦៧%ទៀតអាចមកពីកត្ដាខាងក្រៅដែលទប់បង្អាក់ការវិវត្ដរបស់ទារក នៅពេលមានគភ៌ឱ្យមានលក្ខណៈខុសប្រក្រតី។ កត្ដាទាំងនោះមាន ៖
- ម្ដាយកំពុងពពោះក្នុងត្រីមាសទី១បានប្រើប្រាស់ឱសថមួយចំនួន ដូចជាថ្នាំប្រឆាំងនឹងប្រកាច់ ឬថ្នាំជម្ងឺឆ្កួតជ្រូកថ្នាំព្យាបាលមហារីក ជក់បារី ទទួលទានសុរាជាដើម។
- ម្ដាយឆ្លងវីរុស និងមានជម្ងឺមួយចំនួន ដូចជាស្អូច ដែលធ្វើឱ្យទារកកើតមិនគ្រប់លក្ខណៈពីកំណើត
- កង្វះអាហារូបត្ថម្ភនៅពេលស្ដ្រីពពោះ ដូចជាវីតាមីនបេ១២ អាស៊ីតហ្វូលិកជាដើម
- ប្រើកាំរស្មីវិទ្យុសកម្មទៅលើម្ដាយដែលពពោះ អាចធ្វើឱ្យទារកកើតមកមិនគ្រប់លក្ខណៈបានដែរ។
ការព្យាបាលវះកាត់មាត់ឆែប
ដើម្បីធានាសុវត្ថិភាពក្នុងការវះកាត់ កុមារមាត់ឆែបចាំបាច់ត្រូវមានសុខភាពល្អ អាយុចាប់ពី២ខែកន្លះនិងមានទម្ងន់លើស ពីប្រាំគីឡូក្រាមឡើងទៅ។ ជាទូទៅការវះកាត់ត្រូវធ្វើឡើងឱ្យបានមុនពេលកុមារចូលរៀនព្រោះជម្ងឺនេះទាក់ទិនសំខាន់ទៅនឹងការ បញ្ចេញសម្លេង ការស្ដាប់ ពិសេសអត្ដចរិត។ ម្យ៉ាងទៀតក្នុងវ័យនេះកុមារកំពុងមានការលូតលាស់ឆាប់រហ័សទាំងប្រាជ្ញាស្មារតី និងសព៌ាង្គកាយ។
- វិធីវះកាត់មាត់ឆែប ៖ កុមារត្រូវមកចុះឈ្មោះនៅថ្ងៃដំបូងដោយទទួលការពិនិត្យយ៉ាងហ្មត់ចត់ពីក្រុមគ្រូពេទ្យឯកទេស ផ្នែកសណ្ដំកុមារ ត្រចៀក ច្រមុះ ធ្មេញ វះកាត់ និងពិនិត្យឈាម មុននឹងធ្វើការវះកាត់នៅថ្ងៃបន្ទាប់។ ការវះកាត់ធ្វើយ៉ាងណាធានា ឱ្យបានបបូរមាត់ស្មើ មិនខើចឬវៀច បន្ថយស្លាកស្នាមបញ្ឈប់ការឈ្លក់ចំណីអាហារតាមរន្ធច្រមុះផ្នែកខាងក្នុង និងកែរន្ធច្រមុះឱ្យបាន ស្មើល្អដូចធម្មតា។ ការវះកាត់មានរយៈពេលពី៤៥ទៅ៩០នាទី។
- ក្រោយការវះកាត់ ៖ អ្នកជម្ងឺទទួលបាននូវការថែទាំពីក្រុមគ្រូពេទ្យរហូតដល់ដឹងខ្លួនមានស្មារតីនឹងនរឡើងវិញមុននឹង បញ្ជូនទៅបន្ទប់សម្រាកព្យាបាល។ អ្នកជម្ងឺទទួលបាននូវការថែទាំមុខរបួសថ្នាំព្យាបាលក្នុងមន្ទីរពេទ្យក្នុងរយៈពេល១ឬ២ថ្ងៃ។ ក្រោយវះកាត់១សប្ដាហ៍ អ្នកជម្ងឺត្រូវវិលត្រឡប់មកជួបគ្រូពេទ្យវិញ ដើម្បីកាត់អំបោះឬធ្នេនិងទទួលការណែនាំពីរបៀបប្រើប្រាស់ ឱសថ និងរបៀបអនាម័យ។
រូបភាពទស្សនាវដ្ដីសុខភាពយើង
ផលវិបាកនៃការវះកាត់ព្យាបាល
ពុំមានគ្រោះថ្នាក់ធ្ងន់ធ្ងរបណ្ដាលមកពីការវះកាត់ទេ លើកលែងករណីខ្លះអាចមានហូរឈាមតាមមុខរបួស១-២ថ្ងៃឬមាន ការចម្លងរោគដែលបង្កឱ្យមានខ្ទុះលើមុខរបួស បើសិនជាការថែទាំមុខរបួសមិនបានដិតដល់និងមានអនាម័យត្រឹមត្រូវ។
អត្ថប្រយោជន៍នៃការវះកាត់ព្យាបាល
កុមារឆែបមាត់នឹងទទួលបានអត្ថប្រយោជន៍សំខាន់ៗជាច្រើនក្រោយវះកាត់។
- សម្ផស្ស ៖ ក្រោយការវះកាត់ កុមារអាចផ្លាស់ប្ដូរមុខមាត់ថ្មី លែងមានការខ្មាសអៀននិងអាចញញឹមដូចកុមារដទៃ ទៀត
- ការនិយាយ ៖ បើឆាប់ទទួលបានការវះកាត់ កុមារអាចរៀននិយាយបានច្បាស់នៅក្នុងវ័យសិក្សា
- ការបរិភោគអាហារ ៖ អាចបៅដោះម្ដាយដោយងាយស្រួល បរិភោគចំណីអាហារមិនឈ្លក់ និងមិនបាក់ទឹកដោះឬខ្វះ អាហារូបត្ថម្ភ
- ដំណុះធ្មេញ ៖ បបូរមាត់ឆែបធ្វើឱ្យធ្មេញមុខដុះលយចេញមកក្រៅ។ ដូច្នេះការដេរភ្ជិតបបូរមាត់ឆែបធ្វើឱ្យបបូរមាត់មាន កម្លាំងទប់ធ្មេញឱ្យដុះត្រង់ជួរ បើសិនការវះកាត់ប្រព្រឹត្ដទៅក្នុងកំឡុងពេលធ្មេញដុះលូតលាស់
- អត្ដចរិត ៖ ការផ្លាស់ប្ដូរមុខមាត់ល្អជាថ្មីឡើងវិញមានអត្ថប្រយោជន៍ធំធេងទៅលើកុមារ។ គេលែងឯកោពុំមានការចំអក ឬបន្ដុះបង្អាប់ពីមិត្ដភក្ដិ គ្មានការខ្មាសអៀន កុមារអាចចូលរួមរៀនសូត្រ ឬសកម្មភាពសង្គមដូចមនុស្សដទៃទៀត។
វិធីបង្ការមាត់ឆែប
ដើម្បីបង្ការជម្ងឺឆែបបបូរមាត់ នៅអំឡុងពេលមានផ្ទៃពោះ ម្ដាយត្រូវទទួលទានអាហារដែលមានជីវជាតិគ្រប់គ្រាន់។ ព្រោះទារកក្នុងផ្ទៃចាំបាច់ត្រូវទទួលយកគ្រប់ជីវជាតិទាំងឡាយ ដែលម្ដាយបានបរិភោគដើម្បីការវិវត្ដសព៌ាង្គកាយនិងខួរក្បាលបាន គ្រប់លក្ខណៈ។ អ្នកម្ដាយដែលកំពុងពពោះមិនគួរប្រើប្រាស់ឱសថគ្មានវេជ្ជបញ្ជានិងមិនគួរឆ្លុះថតដោយកាំរស្មីអ៊ិចក្នុងអំឡុងត្រីមាស ទី១នៃគភ៌ទេ។
ដំបូន្មានអ្នកប្រឹក្សា
អង្គការអ៊ុបពើរ៉េហ្សុនស្មាយមានកម្មវិធីវះកាត់ឆែបបបូរមាត់ ឆែបក្រអូមនិងពិការភាពផ្សេងៗពីកំណើតជូនប្រជាពលរដ្ឋ ។ គ្រប់សេវាកម្មទាំងការយកចិត្ដទុកដាក់ព្យាបាលពីក្រុមគ្រូពេទ្យ ថ្នាំសង្កូវ អាហារហូបចុកនិងការស្នាក់នៅក្នុងមន្ទីរពេទ្យ គឺមិនបង់ ប្រាក់ទេ។ សូមអស់លោកលោកស្រីមេត្ដានាំបុត្រធីតាមកទទួលការវះកាត់ព្យាបាលដែលមានទីតាំងនៅក្នុងមន្ទីរពេទ្យមិត្ដភាពខ្មែរ សូវៀត។ ឆាប់ឡើងដើម្បីស្នាមញញឹម និងអនាគតកូនរបស់លោកអ្នក។
ប្រភព ៖ ទស្សនាវដ្តី សុខភាពយើង លេខ០២២ ខែវិច្ឆិកា ឆ្នាំ២០០៧
Leave a Reply