លំនៅស្ថានជាជម្រកសម្រាប់ការរស់នៅស្នាក់អាស្រ័យហើយមានសារៈសំខាន់យ៉ាងខ្លាំងក្នុង ជីវភាពរស់នៅប្រចាំថ្ងៃរបស់មនុស្សបន្ទាប់ពីចំណីអាហារ និងសម្លៀកបំពាក់។ លំនៅស្ថានមានលក្ខណៈខុសគ្នាទៅតាមតំបន់និងទៅតាមការនិយមចូលចិត្តរបស់ម្ចាស់ផ្ទះ ដូចជាផ្ទះនៅតំបន់អ៊ីរ៉ុប តំបន់អាហ្វ្រិច និងតំបន់អាស៊ីជាដើម។ លំនៅស្ថានមានការប្រែប្រួលលក្ខណៈទ្រង់ទ្រាយផ្សេងៗគ្នាទៅតាមតំបន់នីមួយៗ ហើយពឹងផ្អែកលើមូលដ្ឋានគ្រឹះសំខាន់ៗ ដូចជាវប្បធម៌ ទំនៀមទំលាប់ប្រពៃណី អាកាសធាតុ។ លំនៅស្ថានក៏ជាកញ្ចក់ឆ្លុះបញ្ចាំងពីសភាពតួនាទី ឬឋានន្តរស័ក្តរបស់ម្ចាស់ផ្ទះផងដែរ។
កាលពីអត្ថបទ មុន លោកអ្នកនាងកញ្ញាបានជ្រាបអំពីការសាងសង់ផ្ទះតាមបែបសម័យទំនើបមួយចំនួនខ្លះរួចមកហើយ។ជាមួយគ្នានេះ ទស្សនាវដ្តី សុខភាពយើង គេហទព័រសុភាពកម្ពុជាបានជួបជាមួយកញ្ញា ណុំ សុធារី ជានាយិកាវិទ្យាស្ថាន សិនេរុ និងជាប្រធានក្រុមហ៊ុនសំណង់ រេប៊ីលឌីង នឹងពន្យល់អំពីការសាងសង់ផ្ទះតាមបែបសម័យទំនើបដើម្បីឲ្យប្រិយមិត្តអ្នកអានយល់កាន់តែច្បាស់អំពីប្រធានបទនេះ។
ការរៀបចំប្រព័ន្ធបណ្តាញ ទឹក ភ្លើងនិងប្រព័ន្ធលូទឹក
ការគិតគូរទៅលើប្រព័ន្ធទឹក ភ្លើងក៏ជាបញ្ហាសំខាន់មួយដែរដើម្បីរៀបចំផ្ទះសម្បែងឲ្យមានសោភ័ណភាព និងមានសុវត្ថិភាពដល់អ្នករស់នៅក្នុងគេហដ្ឋាន។ ផ្ទះដែលត្រូវអគ្គីភ័យបានឆាបឆេះមួយចំនួនក៏បណ្តាលមកពីការរៀបចំ តប្រព័ន្ធបណ្តាញភ្លើងមិនបានត្រឹមត្រូវតាមបែបលក្ខណៈបច្ចេកទេស។ រីឯការរៀបចំប្រព័ន្ធទឹក និងប្រព័ន្ធបង្ហូរទឹកក៏ត្រូវគិតជាមុនឲ្យបានម៉ត់ចត់អំពីតម្រូវការ និងសមស្របទៅតាមចំនួននៃសមាជិកគ្រួសារ និងចំនួនបន្ទប់ដើម្បីប្រាប់ដល់ស្ថាបត្យករនិងអ្នកម៉ៅការសាងសង់។
ការគិតគូអំពីបរិស្ថានដែលនៅជុំវិញសម្រាប់ការសាងសង់
ដើម្បីឲ្យមានផាសុកភាពដល់ក្រុមគ្រួសារ លោកអ្នកគួរជ្រើសរើសទីតាំងសម្រាប់ការសាងសង់។ ប៉ុន្តែបើតំបន់ដែលលោកអ្នកត្រូវសាងសង់មានអាកាសធាតុពុំសូវអំណោយផល លោកអ្នកគួរគប្បីពិភាក្សាជាមួយអ្នកសំណង់ស៊ីវិលឲ្យជួយគិតគូរដល់សំពាធខ្យល់ និងបរិយាកាសនៅតំបន់នោះឲ្យបានល្អជាមុនសិន។ ការដែលសំខាន់គឺត្រូវសង់អគារឲ្យមានខ្យល់ចេញចូលគ្រប់គ្រាន់ ទាំងផ្នែកខាងក្នុងនិងផ្នែកខាងក្រៅអគារ។
អត្ថប្រយោជន៍នៃការសាងសង់ផ្ទះតាមបែបសម័យទំនើប
ការសាងសង់ផ្ទះតាមបែបសម័យទំនើបមានសារៈប្រយោជន៍ជាច្រើនដល់ម្ចាស់ផ្ទះ ព្រោះថាបើសិនជាលោកអ្នកបានគិតគូឲ្យបានល្អិតល្អន់មុននឹងរៀបចំសាងសង់ជាមួយក្រុមហ៊ុនសំណង់នោះ លោកអ្នកនឹងទទួលបានគេហដ្ឋានមួយប្រកបដោយសុវត្ថិភាពខ្ពស់ ព្រមជាមួយសោភ័ណភាព ផាសុកភាពនិងមានសុភមង្គលនៅក្នុងក្រុមគ្រួសារ។
ផលប៉ះពាល់នៃការសាងសង់ផ្ទះតាមបែបទំនើប
ចំពោះផលប៉ះពាល់នៃការសាងសង់ផ្ទះតាមបែបទំនើបគឺការចំណាយលើការសាងសង់មានតំលៃខ្ពស់សម្រាប់ប្រជាជនដែលពុំសូវមានថវិការ។ ប៉ុន្តែបើលោកអ្នកក៏គួរគិតគូរឲ្យបានម៉ត់ចត់ចំពោះការសាងសង់ផ្ទះផងដែរ ព្រោះថាផ្ទះគឺជាជម្រកដ៏ សំខាន់ចំពោះសុវត្ថិភាពរបស់ក្រុមគ្រួសាររបស់លោកអ្នក។
ចំនុចគួរចងចាំចំពោះការជ្រើសរើសក្រុមហ៊ុនសំណង់
ការសម្លឹងមើល និងការជ្រើសរើសក្រុមហ៊ុនសំណង់ដើម្បីសាងសង់គេហដ្ឋានរបស់លោកអ្នកឲ្យបានត្រឹមត្រូវតាមលក្ខណៈបច្ចេកទេស គឺជាបញ្ហាចម្បងក្នុងការសម្រេចចិត្តរបស់លោកអ្នក។ ការងារទាំងអស់រាប់តាំងពីបេតុង ដែក ឈើ ការគូសប្លង់ ការបុកគ្រឹះ និងគ្រប់គ្រងការវិភាគសំណង់ជាដើម គឺត្រូវមានដំណើរការល្អ និងគួរជាទីទុកចិត្ត។ គេហដ្ឋានមួយអាចរឹងមាំក៏អាស្រ័យលើការគ្រប់គ្រង និងការសាងសង់របស់ក្រុមហ៊ុន និងមេជាងសំណង់ផងដែរ។ បើមេជាងខ្វះការត្រួតពិនិត្យឲ្យបានច្បាស់លាស់ និងត្រឹមត្រូវ នោះសំណង់របស់លោកអ្នកនឹងមានបញ្ហាទៅថ្ងៃមុខ។
ដំបូន្មានអ្នកជំនាញ
លោកអ្នកគួរគប្បីជ្រើសរើសក្រុមហ៊ុន និងជ្រើសរើសសម្ភារៈក្នុងការសាងសង់ឲ្យបានត្រឹមត្រូវ និងមានគុណភាពយូរអង្វែង។ ទោះបីជាលោកអ្នកសម្រេចចិត្តជ្រើសរើសក្រុមហ៊ុនសាងសង់ណាមួយក៏ដោយ ចាំបាច់ត្រូវគិតគូរអំពីបញ្ហាបច្ចេកទេសសាងសង់របស់ក្រុមហ៊ុនឲ្យបានត្រឹមត្រូវ ដើម្បីឲ្យគេហដ្ឋានរបស់លោកអ្នកមានភាពរឹងមាំ និងសំណង់មានភាពសមស្របទៅនឹងធម្មជាតិតាមតំបន់ និងកន្លែងដែលលោកអ្នកចង់រស់នៅ។ ជាពិសេសនោះលោកអ្នកដែលមានប្រាក់សមល្មមហើយចង់ទិញផ្ទះល្វែងសម្រាប់រស់នៅក៏គួរគិតអំពីក្រុមហ៊ុនដែលសាងសង់ផ្ទះល្វែងទាំងនោះដោយគួរប្រយ័ត្នប៉ះចំក្រុមហ៊ុនដែលសាងសង់ផ្ទះគ្មានគុណភាព និងស្តង់ដាត្រឹមត្រូវ ។ ព្រោះសព្វថ្ងៃមានក្រុមហ៊ុនសាងសង់ច្រើនណាស់ដែលរកស៊ីសង់ផ្ទះល្វែងលក់ដែលខ្លះគ្មានស្តង់ដាគ្រប់គ្រាន់។
អត្តបទដោយ ៖ សៀង វិរៈ
ចេញផ្សាយ ៖ ថ្ងៃទី១០ ឧសភា ឆ្នាំ ២០១២
Leave a Reply